Buxhetimi i Përgjegjshëm Gjinor (BPGJ) është strategji për integrimin e perspektivës gjinore në planifikimin ekonomik dhe në buxhetin qeveritar. Me të synohet që të përvetësohet një perspektivë për përmirësimin e barazisë së grave dhe burrave në bazë të një analize gjinore në secilën fazë të planifikimit, programimit, dhe realizimit të buxheteve qeveritare. Andaj, një buxhet i këtillë nuk duhet të shihet si buxhet shtesë, por si një mënyrë më e mirë e planifikimit buxhetor, bazuar në informata specifike sa i përket të dy gjinive që janë përfituese të politikave dhe buxheteve të ndryshme tha znj Donjeta Morina Kordinatore për zhvillim të Kapaciteteve nga Rrjeti i Grupit të Grave, në hapje të punëtorisë të organizuar nga ky rrjet me zyrtarët e komunës së Hanit të Elezit.
Ajo tha se një qasje e suksesshme e BPGJ-së analizon ndikimet e ndryshme që politikat për gjenerimin e të ardhurave dhe ato për ndarjen e mjeteve financiare kanë ndaj burrave dhe grave, si dhe në barazinë gjinore. Bazuar në këtë analizë, në politika dhe buxhete mund të prezantohen qëllimet strategjike drejt përforcimit të barazisë gjinore.
Ndërsa Kryetari i komunës Rufki Suma duke përshëndetur iniciativën nga Rrjeti i Grupit të Grave që të trajtojnë aspektet konkrete të Buxhetimit të Përgjegjshëm Gjinor tha se komuna e Hanit të Elezit ka trajtuar këtë temë duke u bazuar në rekomandimet e shumë organizatave, donatorëve dhe OJQ-ve. Kryetari Suma tha se Buxhetimi i Përgjegjshëm Gjinor ka shumë dimensione për të cilat Komuna e Hanit të Elezit ka nevojë për njohuri të reja dhe praktika të mira në mënyrë që ato njohuri dhe praktika të implementohen në përgatitjen e planifikimeve buxhetore në të ardhmen.
Shabi Rexhallari Drejtorë për Buxhet dhe Financa në komunën e Hanit të Elezit tha se Buxhetimi i përgjegjshëm gjinor është një koncept relativisht i ri, jo vetëm për vendin tonë po ashtu edhe për të gjitha vendet e rajonit, prandaj kërkohet nga institucionet relevante të punojnë në atë drejtim që ky koncept i ri të bëhet realitet edhe në Kosovë. Ai tha se krijimi i mundësisë së një buxhetimi të tillë edhe në Kosovë krijon mundësinë të kemi një qasje më transparente ndaj politikave buxhetore, të kemi një përfshirje më të gjerë të përfituesve të buxhetit në politikat buxhetore.
Gjatë punëtorisë u prezantuan praktika të mira të Buxhetimi të Përgjegjshëm Gjinor për të ardhë te vlerësimi se Buxhetimi i Përgjegjshëm Gjinor nuk do të thotë që patjetër të rriten fondet, por mund të rezultojë në përdorim më efikas të fondeve ekzistuese në planifikim dhe buxhetim më të mirë për gra dhe burra.
