Zëvendësministri i Mbrojtjes, Shemsi Syla, bashkë me ekipin e tij, vizitoi komunën e Hanit të Elezit.
Në këtë takim diskutuam çështje të gatishmërisë emergjente në nivelin lokal, për menaxhimin e fatkeqësive natyrore dhe fatkeqësive tjera.
Theksi i diskutimeve ishte tek vlerësimi i rreziqeve dhe rrezikshmërisë dhe pjesët e këtij vlerësimi si: planet parandaluese, skenarët për ushtrime dhe përcaktimi dhe përgatitja e strehimoreve në raste evakuimi dhe strehimi të popullatës së goditur, nga fatkeqësitë natyrore apo ndonjë fatkeqësi tjetër.
Po ashtu, diskutuan edhe çështjet e hartimit të Planeve Operative Emergjente, themelimi i Komiteteve Komunale për Mbrojtje dhe Shpëtim dhe ngritja e Qendrave Operative Lokale, pastaj hartimi i Planeve të Reagimit Emergjent për objektet e rëndësisë së veçantë sikurse në shkolla dhe çerdhe si dhe ngritja, trajnimi dhe certifikimi i njësive reaguese qofshin ato profesionale apo vullnetare.
Zëvendësministri Syla, sipas misionit të Ministrisë së Mbrojtjes dhe Forcës së Sigurisë së Kosovës, mbështetja ushtarake për autoritetet civile, ofroi mbështetjen në hartimin e dokumenteve bazike, po ashtu edhe në trajnimin dhe certifikimin e njësive reaguese, qofshin profesionale apo ekipe vullnetare në kërkim-shpëtim urban, kërkim-shpëtim malor, kërkim-shpëtim ne ujëra, ndihmë të parë, materie të rrezikshme, etj.
Falënderoj zv.ministrin Syla për praninë e tij, ku edhe ofrova bashkëpunim më dinamik në fushën e menaxhimit të fatkeqësive natyrore dhe fatkeqësive tjera.
