Hani i Elezit 26.07.2013
Komuna e Hanit të Elezit mundë të krenohet me infrastrukturën shkollore dhe kushtet e ofruara për zhvillim të procesit arsimorë. Përkundër shumë investimeve që janë bërë në këtë drejtim, komuna e Hanit të Elezit vazhdon të ketë ndër prioritetet e saja investimet në objektet shkollore dhe infrastrukturës përcjellëse.
Në këtë drejtim, koha e pushimeve verore për nxënësit po shfrytëzohet për të bërë renovimet e nevojshme në Shkollën e Mesme të Ulët ,,Veli Ballazhi“ në fshatin Gorancë si përfituese e projektit nga programi ,,Masat e Efiçiencës së Energjisë Elektrike” të financuara nga IPA.
Duke u bazuar në raportet e auditimit i cili përfshinë të dhënat në lidhje me energjinë e konsumuar, gjendjen fizike dhe masat të cilat duhet të ndërmerren për përmirësimin e kushteve në këtë shkollë, Komiteti drejtues në përbërje të përfaqësuesve të Zyrës Ndërlidhëse të Komisionit Evropian , MAPL-së, MZHE-së dhe MAPH-së kanë vendosur që të investohet në këtë shkollë në izolim termik, ndërrimin e dyerve dhe dritareve të jashtme si dhe rehabilitimin e sistemit ekzistues të ngrohjes dhe ndriçimit.
Edhe në Shkollën e Mesme të Ulët “Ilaz Thaçi” në Han të Elezit po punohet në renovimin e nyjeve sanitare, projekt ky që po realizohet në kuadër të marrëveshjes së bashkëpunimit me LOGOS-in. Vlera e investimit në këtë shkollë është 15.354 €.
Drejtori i DAK-së, Nesim Dernjani, tha se projektet të cilat janë duke u realizuar do të përfundojnë deri në fillim të vitit të ri shkollorë duke shtuar se do të intervenohet edhe në objektet tjera shkollore me lyerja dhe renovimet e nevojshme në mënyrë që vitin e ri shkollorë për nxënësit dhe personelin arsimorë të ofrohen kushte optimale për zhvillimin e procesit edukativo-arsimorë.
Zyra për informim
