Hani i Elezit 05.12.2012
Në kuadër të fushatës ndërkombëtare ,,Gjashtëmbëdhjetë ditë aktivizëm kundër dhunës ndaj femrave dhe dhunës në familje” , zyra për barazi gjinore e komunës së Hanit të Elezit organizoi takimin e dytë të radhës me temë ,, Trafikimi i qenieve njerzore” .
Në këtë takim , ku të ftuar ishin nxënës , student, përfaqësues të shoqërisë civile , nga grupi jo formal i grave , zyra e OSBE-së e zyrtarë komunal , u tha se trafikimi i qenieve njerëzore është një dukuri negative që ka përfshirë Kosovën që nga përfundimi i luftës.
Në vitet e para të pasluftës femra të trafikuara silleshin nga jashtë në Kosovë,por vitet e fundit kjo dukuri ka ndryshuar sepse trafikimi i qenieve njerëzore bëhet tani edhe brenda për brenda Kosovës nga trafikantët,që janë kryesisht kosovarë.
Ajete Berisha zyrtare për barazi gjinore, Sead Vila Profesor i Sociologjisë , Bukurie Shkreta nga Grupi jo formal i grave , në prezentimet e tyre theksuan se trafikimi i qenieve njerëzore është një dukuri që ka marrë përmasa gjithnjë e në rritje dhe që konsiderohet si “skllavëri e kohëve moderne”.
Viktimat e trafikimit janë zakonisht vajza në mosha të reja dhe nisur nga dëshira për të përmirësuar kushtet e jetës së tyre dhe të familjeve, bien pre e dhunës së egër që i detyron të punojnë si prostituta.
Faktorët e kësaj dukurie janë një varg kushtesh sociale dhe psikologjike, si varfëria e tejskajshme, mungesa e perspektivës për jetën, dhuna dhe abuzimi në familje e bën këtë kontigjent njerëzor të përfundojë në gjendje falimentimi para trafikantëve
Veprimet që kryhen me viktimat janë të shoqëruara gjithnjë me detyrimin , ushtrimi i forces,kërcënimi për jetën e viktimës,por edhe anëtarëve të familjes së saj ,rrëmbimi ,mashtrimi si dhe forma tjera të abuzimeve .
Qeveria e Republikës së Kosovës ka hartuar Strategjinë dhe Planin e Veprimit,ku janë paraqitur sukseset por edhe sfidat me të cilat shteti ynë duhet të ballafaqohet.
Adresimi dhe trajtimi i trafikimit me qenie njerëzore, për shkak të natyrës së saj komplekse kërkon një vëmendje dhe qasje të veçantë të Institucioneve qeveritare dhe veçmas të OJQ-ve të cilat duhet të ndërmarrin një sërë të aktiviteteve të drejtpërdrejta,informuese,sensibilizuese dhe edukuese,me qëllim të parandalimit të trafikut me qenie njerëzore si dhe ofrimit të ndihmës viktimave të trafikimit
Këto aktivitete duhet përqëndruar kryesisht në vetëdijësimin rreth pasojave të trafikimit dhe ligjet e ndërlidhura me trafikim (zbatimin e ligjeve),ndihmën dhe mbrojtjen sociale të viktimave dhe riintegrimin e tyre.
Rol tejet të rëndësishëm luajnë edhe mediat të cilat duhet dhe munden t’u kushtojnë më shumë vëmendje dhe hapësirë luftimit të trafikimit me qenie njerëzore për çka duhet intensifikuar gazetarinë hulumtuese e cila realisht nuk është e zhvilluar sa duhet u tha ndër të tjera nga debati i pjesmarrësve në këtë takim.
Zyra për Informim
