Kryetari i komunës së Hanit të Elezit Rufki Suma dhe kryesuesi i kuvendit të komunës z.Menduh Vlashi, morën pjesë në konferencën me temën “Sukseset dhe sfidat e komunave të reja të Kosovës”.
Fundi i mbikëqyrjes së pavarësisë së Kosovës do të sjellë përgjegjësi edhe më të mëdha për komunat e Kosovës, pasi që ato do të duhej të mbështeten më shumë në forcat e tyre, për të gjetur mundësi të ndryshme se si t’u ofrojnë kushte për jetesë më të mirë qytetarëve të vet, ishin vlerësimet të cilat dolën nga konferenca e mbajtur sot në Prishtinë të organizuar nga USAID-i ku ishin prezent përfaqësues nga nëntë komunat e reja të dala nga procesi i decentralizimit.
Ambasadori amerikan në Kosovë, Christopher Dell duke iu drejtuar përfaqësuesve të komunave tha se, me përfundimin e mbikëqyrjes së pavarësisë së Kosovës, përgjegjësia mbi supet e tyre do të jetë më e madhe, sepse do të duhej të mendonin si të krijojnë më shumë të hyra për të krijuar kushte sa më të mira për qytetarët e vet.
Ky vit shënon një të arritur tjetër në zhvillimin e Kosovës si shtet, fundin e mbikëqyrjes së pavarësisë. Ky proces në të cilin do të hyni do të ketë ndikim në komuna, do të sjellë përgjegjësi më të mëdha, sepse do të duhet që të mbështeteni më shumë në forcat tuaja, duhet të gjeni rrugë të tjera për të rritur të hyrat tuaja, për të mbështetur investimet kapitale dhe për të përmirësuar shërbimet publike.
Shefi i ICO-së, Piter Feith ka thënë me këtë rast se është e qartë se sfida më e madhe në procesin e decentralizimit mbetet krijimi i komunës së re në veri të Mitrovicës, duke e mbështetur vendimin e qeverisë për hapjen e zyrës administrative për atë pjesë të vendit.
“Është e qartë se detyra më e rëndësishme, e cila mbetet në agjendën e decentralizimit, është themelimi i komunës së re në komunën e Mitrovicës. Javën e kaluar Qeveria e Kosovës e ka marrë një hap shumë të rëndësishëm drejt realizimit të këtij synimi, me vendimin për themelimin e zyrës administrative për Mitrovicën veriore.
Ndërkaq, zëvendëskryeministri dhe ministri i Administrimit të Pushtetit Lokal, Sllobodan Petroviç ka thënë se të gjitha komunat kanë shënuar përparim në përmirësimin e kushteve për qytetarët e vet, por si sfidë i ka cilësuar strukturat paralele të krijuara nëpër komunat e reja.
Komunat e reja kanë shënuar përparim në kuptim të marrjes së përgjegjësive të tyre, siguria dhe marrëdhëniet ndër komuniteteve kanë shënuar rritë dhe trendi është pozitiv, e posaçërisht në komunat e reja, të cilat janë sot këtu të pranishme. Ai shtoi se decentralizimi është në drejtim të mirë atëherë kur e dini se qytetarët do të mund t’i shohin përfitimet nga ky proces dhe ofrimi i shërbimeve në këtë kuptim ka shënuar përparim të madh, por edhe më tutje mbetet shumë për t’u bërë në këtë drejtim.
Zyra për Informim
