Sot përkujtuam me nderim të thellë dëshmorët Xhevdet dhe Feriz Guri, dy vëllezër që mishëruan idealin më të lartë të atdhedashurisë. Ata vepruan e luftuan në etapa të ndryshme të historisë së Kosovës, gjithmonë krah njëri-tjetrit dhe përkrah bashkëluftëtarëve të Ushtrisë Çlirimtare të Kosovës, deri më 22 prill 1999, kur ranë heroikisht për lirinë e vendit.
Rënia e tyre nuk ishte humbje, por ishte themel i lirisë që gëzojmë sot. Sakrifica e tyre dhe e mijëra luftëtarëve të UÇK-së dëshmon se liria nuk erdhi rastësisht, por si rezultat i një përpjekjeje të madhe kolektive, të mbështetur në guxim, vendosmëri dhe dashuri të pakushtëzuar për atdheun.
Në vendin ku ranë, sot qëndron pllaka përkujtimore si dëshmi e përjetshme e sakrificës së tyre dhe si thirrje për brezat e rinj që të mos harrojnë kurrë çmimin e lirisë. Kujtimi për ta nuk është vetëm nderim, por obligim për të ruajtur, forcuar dhe çuar përpara vlerat për të cilat ata dhanë jetën.
Lavdi e përjetshme dëshmorëve Xhevdet dhe Feriz Guri!
