Hani i Elezit 10.06.2014
Në vigjilje të festës së madhe 11 Qershorit “Ditës së Çlirimit” të Hanit të Elezit,shumë aktivitet kulturore, sportive dhe artistike në kuadër të përmbylljes së “Javës Kulturore”.
Me ndeshjen e mbrëmshme finale të turnirit në futboll të vogël ku pas një loje tejet interesante ndërmjet KF DITA – MISIONI I RI 60, fitues doli MISIONI I RI 60, aktivitete sportive vazhduan edhe sot me garën tashmë tradicionale në vrapin në rrugët e Hanit të Elezit, ku pjesëmarrës ishin shumë dashamirë të atletikës nga shumë klube anë e kënd Kosovës të të gjitha kategorive.Pas një gare të realizuar shumë mirë nën patronatin e Federatës së Atletikës së Republikës së Kosovës e cila u përkujdes edhe për aspektet teknike, fitues në këto gara dolën:
1.Në kategorinë e Senioreve –Antigona Shala nga klubi Llap
2.Në kategorinë e Seniorëve-Emin Graiqevci nga Lipjani
3.Në kategorinë e Juniorëve për femra –Arbenita Oraci nga klubi Llap
4. Në kategorinë e Juniorëve për meshkuj-Besart Lahu nga klubi Llap
Ndërsa nga grupmoshat e shkollave fillore të Hanit të Elezit në kategorin për femra ngadhënjeu Elvira Qajani ndërsa në kategorinë e meshkujve ngadhënjeu Çlirim Ballazhi.
Të gjithë fituesit në këto gara u shpërblyen me Kupa dhe Mirënjohje .
Gjatë ditës përveç aktiviteteve të shumta sportive u organizuan edhe aktivitet kulturore.Në këtë vazhdë në Hollin e Shtëpisë së Kulturës “Imri Curri” në Han të Elezit u hap edhe ekspozita individuale e nxënësit Arben Etemi.Në hapjen e kësaj ekspozite ishin shumë artdashës ndër ta edhe kryetari i komunës Rufki Suma.
Aktivitetet e kësaj dite kulmuan në mbrëmje me shfaqjen e Dramës së Mirënjohur “Nita”të Josip Relës. Me një skenografi, kostimografi dhe ambientë të shkëlqyeshëm, të udhëhequr nga profesoresha e artit Bukurije Shkreta Kempfer, anëtarët e Grupit Dramatik nën patronatin Drejtorisë për Arsim, Kulturë Rini dhe Sport, prezantuan në mënyrë të shkëlqyeshme shfaqjen e Dramës “Nita”.
Eljesa Curri në rrolin e NITËS, Armend Ballazhi në rolin e ZEFIT, Besnik Rogaqi në rolin e PRENK VUKËS, të përcjellur dhe të mishëruar nga anëtarët tjerë të kësaj trupe, realizuan entuziazëm dhe emocione të publikut prezentë në sallën e stërmbushur të shtëpisë së kulturës. Edhe se që të gjithë të rinj në moshë, ata me realizimin e tyre dëshmuan pjekuri artistike duke u kujdesur që të prezantojnë edhe detajet më të veçanta të kësaj drame.
Shpërblimi më i mirë ju erdhe nga publiku prezentë të cilët me duartrokitje dhe ovacione, respektuan mundin dhe vullnetin e tyre për realizimin e shkëlqyeshëm të kësaj drame.
Zyra për informim
