Hani i Elezit 18.10.2012
Në kuadër të Marrëveshjes së Mirëkuptimit ndërmjet Ministrisë së Bujqësisë , Pylltarisë dhe Zhvillimit Rural – Agjencionit Pyjorë të Kosovës dhe Ministrisë së Punës dhe Mirëqenies Sociale për punësim sezonal të punëtorëve në aktivitete silvikultorore në sektorin e pylltarisë ,75 persona të komunës së Hanit të Elezit për një muaj do të angazhohen në sanimin e dëmeve që kanë shkaktuar zjarret, në damkimin e masës drusore që është dëmtuar dhe në aktivitete të tjera në sanimin e dëmeve tjera në pyje.
Për këtë qëllim, Ministria e Bujqësisë, Pylltarisë dhe Zhvillimit Rural ka nënshkruar një marrëveshje bashkëpunimi me Ministrinë e Punës dhe Mirëqenies Sociale, e cila do t’i rekrutojë punëtorët përmes zyrave komunale për punësim.
Agjencioni Pyjor i Kosovës, i cili funksionon në kuadër të Ministrisë së Bujqësisë, Pylltarisë dhe Zhvillimit Rural, për t’u përkujdesur për mbarëvajtjen e programit për sanimin e gjendjes në pyje do të caktojë mbikëqyrës dhe teknikë të pylltarisë nëpër secilin vendëpunim.
Agjencioni i i pyjeve të Kosovës i cili ka caktuar lokacionet për zhvillimin e këtyre aktiviteteve dhe numrin e forcës së punës në komuna në përputhje me sipërfaqen e dëmtuara ka paraparë që sanimi të bëhet në lokacionet Krivenik ,Gorancë dhe Paldenicë ,aty ku janë konstatuar edhe dëmet më të mëdhe të zjarreve.
Rekrutimi dhe selektimi i të punësuarve është bërë përmes zyrave komunale të punësimit, prej të cilëve 70 % e tyre janë të kategorisë së dytë të ndihmës sociale dhe do të jenë të angazhuar deri me 15 nëntor të vitit 2012 dhe do të kompenzohen me pagë mujore prej 250 €.
Zyra për Informim
