Instituti Kosovar për Qeverisje Lokale, përmes programit edukativ "Akademia për Qeverisje Lokale" hapi modulin e dytë, i cili u mbajt nga data 3-5 prill 2014, me trajnimin e avansuar me temë “Lidershipi dhe të folurit publik”.
Trajnimin “Lidershipi dhe të folurit publik” e moderuan z.Besnik Tahiri, Magjistër i Qeverisjes Lokale dhe Zhvillimit Ndërkombëtar ndërsa artin e të folurit publik e prezantoi znj.Ariana Haxhiu-Maci, specialiste e komunikimit nga organizata Anttarc, Shqipëri.
Në hapje të modulit z.Besnik Tahiri theksoi se sistemi i ri i qeverisjes lokale, ka fuqizuar rolin e udhëheqjes individuale. Kryetarët e ri të komunave duke qenë në fillim të mandatit qeverisës në mënyrë që t’i arrijnë objektivat programore e kanë me urgjencë të bëjnë rishikimin e fuknksionalitetit të organizimit të sektorëve në komunë në mënyrë që të sigurohet zhvillim i qëndrueshëm.
Zhvillimi dhe avancimi i qeverisjes lokale në Kosovë është bërë kryesisht në mënyrë ad hoc e jo në mënyrë sistematike. Prandaj ndarja e përgjegjësive në mes udhëheqjes politike kundrejt asaj menaxheriale dhe teknike, para së gjithash kërkon edhe fuqizimin e kapaciteteve si aspekt kyç në sigurimin e zhvillimit të qëndrueshëm të qeverisjes lokale në Kosovë. Procesi i decentralizimit ka vendosur autoritetin dhe përgjegjësinë lokale më afër qytetarëve, duke i dhënë lidershipit lokal shumë më shumë përgjegjësi në lidhje me politikëbërje, planifikim, buxhetim dhe gjenerim të të hyrave.
Sa i përket komunikimit me publikun, z.Tahiri theksoi se llogaridhënia dhe transparenca janë shtylla të domosdoshme të qeverisjes demokratike që e nxisin shtetin, sektorin privat dhe shoqërinë civile të përqendrohen në rezultate, të kërkojnë objektiva të qarta, të zhvillojnë strategji efikase, të monitorojnë dhe raportojnë për performancën e tyre. Përmes llogaridhënies dhe transparencës publike, qeveritë, bashkë me shoqërinë civile dhe sektorin privat, mund të arrijnë harmoni ndërmjet politikave publike, zbatimit të tyre dhe ndarjes efikase të resurseve.
Sipas Tahirit vetëm duke ndërtuar dhe zbatuar një metodologji të hollësishme specifike për shqyrtimin e funksionalitetit në nivelin lokal për organizimin ose ri-sistemimin e punonjësve, mund të arrihet në krijimin dhe zhvillimin e kapaciteteve absorbuese që ndikojnë në zbatimin e kompetencave lokale me transparencë dhe efektivitet. Andaj duhet të angazhohemi në formulimin dhe zbatimin e një programi të aftësimit teknik e profesional të punonjësve komunalë, në të gjitha nivelet, me qëllim të forcimit të aftësive të punonjësve në fushat e rëndësishme funksionale të komunave, duke i kushtuar rëndësi të veçantë fushave strategjike.
Ndërkaq, Ariana Haxhiu-Maci, specialiste e komunikimit publik në ligjëratën rreth të folurit publik theksoi se modernizimi i menaxhmentit ka për qëllim që në mënyrë gjithëpërfshirëse të zhvillojnë aftësitë e rëndësishme dhe përgjithësisht të ndryshojnë mënyrën e të menduarit të menaxherëve dhe punëtorëve komunalë drejt një kulture më pro aktive të komunikimit.
Akademia për Qeverisje Lokale është një program edukativ dhe trajnues i zhvilluar nga Instituti Kosovar për Qeverisje Lokale i dizajnuar enkas për të forcuar kapacitetet vendore të lidershipit politik dhe stafit civil të komunave, i cili përfshinë edhe përfaqësues të shoqërisë civile.
Pjesëmarrës të këtij trajnimi ishin zyrtarë nga komunat Gjilan,Kamenicë, Kastriot,Prizren, Hanit të Elezit,Podujevë,Graçanicë e Shtërpcë të cilët e vlerësuan lartë përmbajtjen e trajnimit.
Zyra për Informim
