Me keqardhje dhe shqetësim të madh dua të reagoj ndaj dëmtimeve të përsëritura të disa prej projekteve kapitale që janë realizuar së fundmi në qytetin tonë. Bëhet fjalë për investime që janë bërë me qëllim të përmirësimit të hapësirave publike dhe krijimit të një qyteti më të mirë për të gjithë ne.
Muzeu i Qytetit – xhami i muzeut është dëmtuar për herë të dytë, menjëherë pas zëvendësimit të tij.
Ballkoni panoramik pranë shkronjave të UÇK-së – është dëmtuar xhami anësor i kësaj hapësire, e cila përveçse është një pikë panoramike, ndodhet në një lokacion me rëndësi të veçantë për historinë tonë.
Parku te Pishat – është dëmtuar çezma e furnizimit me ujë të pijshëm si donacion nga një qytetar i nderuar, pjesë e një projekti që tashmë është pothuajse në fazën përfundimtare të funksionalizimit.
Këto nuk janë thjesht xhama, çezma apo elemente infrastrukturore. Janë investime publike. Janë taksat dhe puna jonë e përbashkët. Çdo dëmtim i tyre nuk dëmton vetëm një projekt të komunës, por dëmton drejtpërdrejt komunitetin dhe secilin prej nesh.
Si institucion, jemi në proces të vendosjes së kamerave të sigurisë në këto dhe hapësira të tjera publike, me qëllim rritjen e sigurisë dhe parandalimin e rasteve të tilla. Gjithashtu, Policia e Kosovës është në dijeni për rastet dhe është duke i hetuar ato.
Por, përtej kamerave, policisë dhe masave të tjera të sigurisë, na duhet edhe ndërgjegjësimi i secilit prej nesh. Prandaj, bëj thirrje publike për të gjithë qytetarët që të mos dëmtojmë atë që është ndërtuar për ne.
Një qytet nuk ndërtohet vetëm me projekte dhe beton. Një qytet ndërtohet edhe me kulturë, përgjegjësi dhe respekt për atë që është e përbashkët
