Komuna e Hanit të Elezit shpreh shqetësimin e saj për mungesën e mbështetjes buxhetore për Universitetin e Shkencave të Aplikuara në Ferizaj në kuadër të planifikimeve për vitin 2027.
Ky universitet ka një rëndësi të veçantë jo vetëm për qytetin e Ferizajt, por për gjithë rajonin, pasi për vite me radhë ka qenë destinacion akademik edhe për studentë nga Hani i Elezit dhe komunat përreth. Përmes programeve të tij, ai ka kontribuar në përgatitjen e profesionistëve të rinj dhe në krijimin e një lidhjeje të drejtpërdrejtë mes arsimit të lartë dhe nevojave të tregut të punës.
Mosparashikimi i mjeteve financiare për funksionimin e këtij institucioni ngre shqetësime serioze për të ardhmen e tij dhe dërgon një mesazh të gabuar për rëndësinë që duhet t’i kushtohet arsimit të lartë publik. Një vendim i tillë prek drejtpërdrejt studentët, stafin akademik dhe zhvillimin e gjithë rajonit.
Komuna e Hanit të Elezit u bën thirrje institucioneve qendrore që ta rishikojnë këtë qasje dhe të sigurojnë financimin e nevojshëm, në mënyrë që Universiteti i Shkencave të Aplikuara në Ferizaj të vazhdojë veprimtarinë e tij pa pengesa.
Ruajtja dhe fuqizimi i institucioneve të arsimit të lartë është përgjegjësi e përbashkët. Investimi në universitete nuk është vetëm mbështetje për studentët e sotëm, por edhe garanci për zhvillimin ekonomik, profesional dhe shoqëror të vendit në të ardhmen
