Hani i Elezit 16.12.2013
Në hapësirat e sallës së kuvendit të komunës së Hanit të Elezit sot është bërë promovimi i publikimit “Trashëgimia kulturore në trevën e Hanit të Elezit”.
Projekti “Promovimi i vlerave kulturore dhe identifikimi i trashëgimisë kulturore në trevën e Hanit të Elezit” është projekt i financuar në bazë të marrëveshjes ndërmjet MAPL-së dhe komunës së Hanit të Elezit dhe është realizuar nga OJQ “HANARIN” nga Prishtina.
Para përfaqësuesve të institucioneve publike, institucioneve arsimore, artdashës, e të ftuar tjerë në këtë solemnitet rasti, Arton Shabani, redaktori i këtij publikimi falënderoi MAPL-në, Komunën e Hanit të Elezit, bashkëpunëtorin shkencorë në realizimin e këtij projekti Shaban Çupin, bashkëpunëtorin në realizimin fotografik të këtij libri Isa Shkretën si dhe u.d Drejtorë i DKA-së Irfan Qajanin, që ndihmuan në realizimin e këtij projekti. Ai tha se gjatë kësaj kohe kemi punuar me shumë përkushtim si ekip në mënyrë që të realizojmë këtë projekt që do të jetë themel i trashëgimisë kulturore të komunës së Hanit të Elezit. Mendojmë që ky projekt do të shërbejë për gjeneratat e ardhshme të kësaj komune.
Ndërsa kryetari i komunës së Hanit të Elezit Rufki Suma duke përshëndetur të pranishmit tha se komuna e Hanit të Elezit në vazhdimësi ka bërë përpjekje për identifikimin e vlerave dhe trashëgimisë kulturore, mirëpo në mungesë të mjeteve financiare asnjëherë nuk kemi pas mundësi që të realizojmë ndonjë projekt të kësaj natyre. Mirëpo falë donacionit nga MAPL-ja i cili si synim ka pas trajnimin dhe identifikimin e vlerave të trashëgimisë kulturore në trevën tonë, njëkohësisht jemi dakorduar që të botojmë këtë publikim. Kryetari Suma falënderoi edhe një herë MAPL-në dhe të gjithë ata që u angazhuan në realizimin e këtij publikimi në veçanti realizuesin e këtij projekti OJQ-në “HANARIN” me seli në Prishtinë.
Në prezantimin e përmbajtjes të publikimit “Trashëgëmia kulturore në trevën e Hanit të Elezit” bashkëpunëtori shkencorë Shaban Çupi, ndër të tjera tha se ky libër është një panoramë vlerash kulturore të cilat u trashëguan nga brezi në brez në këtë trevë. Në këtë libër janë prezantuar rreth 170 eksponate të natyrave të ndryshme, duke filluar nga trashëgimia e paluajtshme siç janë shtëpitë, të cilat ngërthejnë në veten e tyre vlerën arkitekturale dhe mënyrën e jetesës së familjes shqiptare në të kaluarën. Në libër pasqyruam edhe artefakte arkeologjike, të cilat u zbuluan rastësisht nëpër kohë, ku nëpërmjet tyre argumentohet qenia ilire në këtë vendbanim si dhe mure të kalave dhe relikte të kishave Iliro-Arbërore, të cilat nuk u hulumtuan kurrë në aspektin shkencorë. Ky libër, në një mënyrë është “Muze” i cili pasqyron të kaluarën tonë me artefakte nga shekulli i –II- i erës sonë e deri më sot dhe te brezat e rinjë sjellë trashëgiminë tonë kulturore e cila nëpër kohë duhet të plotësohet dhe pasurohet edhe më tej tha z. Çupi.
Zyra për informim
