Hani i Elezit 22.04.2014
Në 15-vjetorin e rënies për liri, përkujtohen dëshmorët e UÇK-së, Feriz Guri – komandant Shpata dhe bashkëluftëtari i tij Xhevdet Guri.
Për t’i nderuar në këtë përvjetor është mbajtur një manifestimin përkujtimor, në vendin e rënies, në fashtin Gorancë, në afërsi të kufirit Kosovë-Maqedoni, në të cilin kanë marrë pjesë përfaqësues të institucioneve komunale të Kaçanikut, Hanit të Elezit, Policisë së Kosovës, pjestarë të FSK-së, bashkëluftarë të dëshmorëve, familjarë e të afërm dhe banorë të Hanit të Elezit dhe rrethinë.
Për të përkujtuar veprën e Komandant Shpatit, para pjesëmarrësve me fjalë rasti iu drejtua z.Hajrush Kurtaj i cili vlerësoi lartë punën, veprën dhe sakrificën e Feriz Gurit-Komandant Shpata.
Ndërsa Kryetari i komunës së Kaçanikut z.Besim Ilazit tha se “ditët janë të zakonshme mirëpo këto data janë të veçanta siç ishin edhe vetë këta dëshmorë të lirisë, ishin këta djem e vajza të cilët projektuan të ardhmen e vendit tone. Ishin këta djem e vajza të cilët falë guximit dhe vizionit që kishin, sot në po e gëzojmë lirinë. Ne sot jemi këtu për ti kujtuar dhe për të mos harruar kurrë. Këta djem e vajza ishin arkitektët e së ardhmës të cilët neve na i lane amanet dhe obligim që të ecim përpara tha kryetari Ilazi.
Pjesëmarrësit e këtij tubimi përkujtimorë në emër të familjarëve të dëshmorëve i përshëndeti z.Habib Guri i cili vlerësoi lartë pjesëmarrjen e institucioneve dhe qytetarëve në këtë tubim. Ai po ashtu falënderoi edhe banorët e fshatit Gorancë të cilët me punë vullnetare janë angazhuar në mirëmbajtjen dhe rregullimin e pllakës përkujtimore.
Në emër të banorëve të fshatit Gorancë pjesëmarrësit i përshëndeti z.Shefket Lusnjani .
Tubimi përkujtimorë u përmbyll me vendosjen e kurora lulesh nga kryetari i Komunës së Kaçanikut, z.Besim Ilazi, në emër të komunës Hanit të Elezit, nënkryetari Menduh Vlashi, si dhe familjarët dhe bashkëluftëtarët e dëshmorëve.
Zyra për Informim
