Hani i Elezit 20.09.2011
Në Novobërdë, është mbajtur takimi I Këshillit Koordinues të projektit Zvicër –Kosovë, për qeverisje lokale dhe decentralizim, LOGOS, në të cilin krahas përfaqësuesve të Ministrisë së Pushtetit Lokal, Asociacionit të Komunave të Kosovës dhe Zyrës për Bashkpunim të Zvicrës në Kosovë, morrën pjesë edhe kryetarët apo nënkryetarët e komunave partnere të projektit LOGOS, Novobërd, Kamenicë, Ranilluk, Partesh, Kllokot, Viti, Kaçanik e Hani i Elezit.
Udhëheqësja e Zyrës Zvicerane për Bashkpunim Marie Marchand, ka thënë se bashkpunimi i ndërsjellt mes projektit LOGOS dhe komunave partnere në realizmin e projekteve të ndryshme, është i një rëndësie të veçantë në implementimin e projekteve të ndryshme që janë në interes të qytetarëve, dhe në këtë drejtim këto takime i ndihmojnë implementimit më me sukses të këtyre projekteve.
Zëvendës ministri i pushtetit lokal, Basri Musmurati, ka vlerësuar lartë bashkpunimin e projektit LOGOS me komunat, duke potencuar se përmes projeteve të përbashkëta që po realizohen komunat po përfitojnë projekte për qytetarët e tyre. Ai ka kërkuar nga komunat një angazhim edhe më të shtuar që projektet që implementohen në bashkpunim me projektin LOGOS të realizohen me sukses.
Norbert Piljs, koordinator i projektit LOGOS, ka thënë se në fazën e dytë të këtij projekti komunat partnere po ndihmon në hartimin e planeve zhvillimore komunale dhe urbane, planin rregullativ, dhe në rritjen e shkallës së inkasimit të të hyrave vetanake, hartimin e rregulloreve për qeverisje në nivel komunal, barazi gjinore, ngritje të kapaciteteve për zyrat e informimit publik, planifikim të buxhetit, menaxhim të mbeturinave të ngurta, operacionalizim të zyrave pritëse si dhe përmes fondit investiv në projekte të ndryshme të infrastrukturës. “
Në komunat Kamenicë, Shtërpce dhe Novobër , tani ka përfunduar faza a dytë e hartimit të planeve zhvillimore komunale dhe urbane, në komunat Viti dhe në atë të Hanit të Elezit është duke u hartuar plani për menaxhim të mbeturinave të ngurta, në Kamenicë është hapur qendra pritëse për qytetarë, të gjitha komunat po ndihmohen në rritjen e shkallës së inkasimit të të hyrave vetanake si dhe në procesin e planifikimit të buxhetit.Kurse përmes fondit investiv janë realizuar 12 projekte të infrastrukturës”, ka thënë Piljs.
Përfaqësuesit e komunave partnere pjesëmarrëse në këtë takim kanë thënë se për komunat që përfaqësojnë është shumë në interes bashkpunimi me projektin LOGOS, pasi ky projekt po ndihmon si në ngritje të kapaciteteve humane të komunave ashtu edhe në projekte investive. Muzafer Dernjani, nëkryetar i komunës së Hanit të Elezit, ka thënë se projekti LOGOS, këtë komunë krahas aktiviteteve tjera është duke e mbështetur edhe në planin për menaxhim të mbeturinave, plan ky shumë i rëndësishëm që ka të bëjë me zgjidhjen e një problemi të madh për qytetarët e kësaj komune.
Projekti LOGOS mbështet Zyrën e Informimit Publik për Komunën e Hanit të Elezit
Me qëllim të ngritjes së kapaciteteve për informimin e qytetarëve si dhe ndërtimit të marrëdhënieve mes komunës së Hanit të Elezit dhe qytetarëve të kësaj komune, koordinatori i projektit LOGOS, Norbert Piljs dhe nënkrytetari i komunës së Hanit të Elezit ,Muzafer Dernjani , kanë nënshkruar një marrëveshje sipas së cilës, Zyra e Informimit Pubik, do të përfitoi një asistencë në vlerë prej 2 mijë euro, të cilat do të shërbejnë për implementimin e aktiviteteve të ndryshme në lëmin e informimit publik.
Zyra për Informim
