Nënshkruam marrëveshje partneriteti në mes Komunës Hani i Elezit, Fondacionit CNVP dhe Organizatës LAB.
Bashkë me drejtorin Abdurraman Bushi realizuam takim për finalizimin e një marrëveshje partneriteti mes tre akterëve, ku mirëpritëm z.Xhevat Lushi- drejtor i Fondacionit CNVP për Kosovë, z.Egzon Tahirukaj – këshilltar për pylltari në CNVP dhe z.Hysen Shabanaj – drejtor i organizatës LAB.
Qëllimi i kësaj marrëveshje trepalëshe është stimulimi i menaxhimit të qëndrueshëm të pyjeve nëpërmjet përgatitjes së një plani operacional për aktivitetet silvikulturore në pyjet publike, zbatimi i punëve silvikulturore në pyjet e degraduara për të përmirësuar strukturën dhe për të nxitur rritjen vjetore, si dhe prodhimin e biomasës për sistemet e ngrohjes në dy shkolla fillore në komunën e Hanit të Elezit.
Përmes kësaj marrëveshje pritet që përfitues të jenë ndërmarrjet e licensuara për shërbime pyjore dhe akterët tjerë, komuna duke zëvendësuar blerjen e drurit për ngrohje me prodhimin e ashklave të prodhuar lokalisht, institucionet publike arsimore duke ulur koston e shpenzimeve për ngrohje përmes prodhimit të biomasës, si dhe përfitime të mëdha mjedisore duke përfshirë përmirësimin e ekosistemeve pyjore, ulja e ndotjes së mjedisit, e përmirësimi i strukturës së grumbujve pyjor dhe përmirësimi i rritjes vjetore të biomasës.
Falënderoj bashkëpunëtorët për arritjen e këtij bashkëpunimi mjaft me rëndësi për komunën tonë!
