Hani i Elezit19.09.2012
Në ambientin e Bibliotekës Kombëtare dhe Universitare në Prishtinë, është promovuar libri “Flakadanët e lirisë” kushtuar Dëshmorëve të Kombit të Komunës së Hanit të Elezi.
Kjo Monografi e cila ngërthen në vete sakrificën e popullit tonë për liri, e në veçanti kontributin e dëshmorëve për çlirimin e atdheut nga pushtuesi serb , është kontribut i jashtëzakonshëm i Shoqatës së Familjeve të Dëshmorëve të komunës së Hanit të Elezit të cilët u munduan që sadopak të lënë gjurmë të luftës së lavdishme të UÇK-së dhe të ndriçojnë vlerat e dëshmorëve të cilët me gjakun e tyre shkruan historinë për tua lënë gjeneratave që vijnë pas , dëshminë që vetëm me luftë është dashtë që një herë e përgjithmonë të largojnë okupatorin serb nga ky vend.
Në këtë përurim ka marrë pjesë edhe veprimtari i njohur i çështjes kombëtare, Adem Demaçi, i cili ka thënë se po përkujtohen edhe një herë dëshmorët të cilët me vetëdije ranë për lirinë dhe për të drejtën e gjithë njerëzimit dhe të popullit tonë
“ Lufta jonë që u bë me gjak dhe sakrifica të mëdha ende nuk ka përfunduar. Tash duke përkujtuar vazhdimisht heronjtë e dëshmorët tanë që të mos e harrojmë të kaluarën, që të dimë se kush kemi qenë dhe ku kemi qenë, duhet të përpiqemi që ta bindim Evropën, të bindim botën se ky popull ka të drejt të jetë i barabartë me popujt tjerë dhe që do të jetë i barabartë me popujt tjerë”, ka thënë Demaçi.
Duke përshëndetur të pranishmit në këtë ngjarje të veçantë Kryetari i komunës Rufki Suma tha: pjesmarrja e juaj në këtë promovim nderon luftën e lavdishme të UÇK-së , nderon Familjet e Dëshmorëve të cilët dhanë bijtë e bijat më të mira që ne sot të punojmë, të kremtojmë, të promovojmë dhe të jetojmë të lirë.
Duke folur për angazhimet e luftëtarëve të lirisë në pjesën e Hanit të Elezit z. Suma, tha se amaneti i dëshmorëve është përmbushur pjesërisht me çlirimin e Kosovës, megjithatë mbetet të angazhohemi për ta përmbushur amanetin e tyre, i cili ishte bashkimi kombëtar.
Të nderuar pjesmarrës ,botimi I këtij libri monografik përkon me përvjetorin jubilar të 100 vjetorit të Pavarsisë së shtetit Shqiptarë, andaj këto përvjetore duhet të shërbejnë si një lidhje me brezat e kaluar, të rilindasve të kombit të përshkruara me sakrifica dhe dhëmbje por që na lanë në amanet dhe trashëgëmi 100 vjet të Shtetit, Kombit dhe Flamurit Kombëtarë Shqiptarë tha z. Suma.
Kjo është dëshmia më e mirë se shqiptarët gjithnjë kanë qenë , janë dhe duhet të jenë të bashkuar ,dhe se nuk do të na ndajë askush as me gurë as me kufijë , jemi një popull , kemi një gjuhë , një histori e një Flamur , kemi një tokë e një emër ,,Shqipëtarë" dhe një atdhe që quhet Shqipëri.
Shaban Qupi anëtari i Këshillit botues pranë Shoqatës së Familjeve të Dëshmorëve në Hanin e Elezit, tha se në luftën çlirimtare nga treva e Hanit të Elezit kanë rënë trembëdhjetë dëshmorë, të gjithë intelektual që morën pjesë në tri ushtritë çlirimtare. “Monografia në fjalë ngërthen në vete sakrificën e popullit tonë për liri, e në veçanti kontributin e maksimal të dëshmorëve për çlirimin e atdheut nga pushtuesi serb”, ka thënë ai.
Me nga një fjalë rasti, të pranishmëve, u është drejtuar edhe kryetari i Familjeve të Dëshmorëve, Xhavit Jashari dhe zëvendësministri i Punës dhe Mirëqenies Sociale, Berat Luzha.
Zyra për Informim
