Hani i Elezit 13.12.2013
Shkolla Fillore e Mesme e Ulët “Veli Ballazhi” e fshatit Gorancë të komunës së Hanit të Elezit me një solemnitet rasti shënon përvjetorin e nëntë të riemërimit me emrin e Dëshmorit të luftës së UÇK-së Veli Ballazhi.
Përfaqësues të institucioneve publike me në krye kryetarin e Komunës Rufki Suma,anëtarë të familjes së Dëshmorit Veli Ballazhi, përfaqësues të Policisë së Kosovës, KFOR-it, të institucioneve shkollore, banorë të fshatit Gorncë, arsimtarë e nxënës, ishin tubuar sot në hapësirat e kësaj shkollë që me një manifestim madhështorë të përkujtojnë veprën e dëshmorit Veli Ballazhi dhe për të prezantuar të arriturat e këtij institucioni të rëndësishëm shkollorë të Komunës së Hanit të Elezit.
Duke i përshëndetur të pranishmit dhe duke ju uruar mirëseardhje në këtë datë të shënuar, Drejtori i shkollës z.Faruk Berisha tha se ka nderin që në emër të kësaj shkolle të përshëndes me respektin më të madhë familjen e dëshmorit emrin e së cilës e mbanë kjo shkollë dhe të gjithë të pranishmit të cilët me pjesëmarrjen e tyre nderuan këtë shkollë. Duke revokuar mbi jetën dhe veprën e dëshmorit Veli Ballazhi z.Berisha tha se kjo shkollë me krenari mban emrin e atdhetarit të dalluar të trevës sonë i cili ra dëshmorë në malet e Pashtrikut .
Në vazhdim z. Berisha tha se kjo shkollë ka 144 nxënës të sistemuar nga klasa e parë deri në klasën e nëntë dhe me paralele të mësimit parashkollorë. Shkolla e jonë funksionon me kushte shumë të mira për zhvillimin e procesit edukativo arsimorë falë shumë investimeve të cilat janë realizuar si nga donacionet e Komisionit Evropian por edhe me investimet e komunës së Hanit të Elezit tha z. Berisha.
Të pranishmëve me një fjalë rasti iu drejtua edhe kryetari i komunës së Hanit të Elezit Rufki Suma.Ai tha se kjo datë ka karakter të dyfishtë, shënohet dita e shkollës “Veli Ballazhi” dhe njëherit përkujtojmë 15-vjetorin e rënies heroike të Dëshmotit Veli Ballazhi bashkë me 36 Dëshmorët e tjerë në malet e Pashtrikut. Ishte 14 dhjetori i vitit 1998 kur me ushtarët jo vetëm nga Hani i Elezit por nga e tërë Kosova kishin mësyer t’i bashkohen luftës në Kosovë. Ata ranë në pritën e organizuar nga okupatori serb por ranë për të mos vdekur kurrë. Këto sakrifica bënë që ne të mobilizohemi edhe më shumë që amaneti i tyre për liri të realizohet. Sot ne jemi krenarë për gjakun e dëshmorëve tanë dhe të mijëra dëshmorëve anë e kandë Kosovës dhe që sot të kremtojmë dhe të festojmë të lirë tha z.Suma. Ai uroi stafin arsimorë dhe nxënësit e kësaj shkolle për këtë përvjetorë, duke u zotuar se komuna e Hanit të Elezit do të vazhdojë të përkrahë fuqishëm sektorin e arsimit me projekte e investime të reja.
Pjesëmarrësit e këtij manifestimi në emër të familjes së Dëshmorit Veli Ballazhi i përshëndeti z.Fehmi Ballazhi i cili falënderoi të pranishmit dhe këtë shkollë për respektin e treguar për jetën dhe veprën e Dëshmorit emrin e së cilës e mbanë kjo shkollë.
Manifestimi u përmbyll me një program të shkëlqyer me recitime, këngë e valle të realizuar nga nxënësit e kësaj shkolle.
Zyra për Informim
