Hani i Elezit 11.03.2014
Zyrtarë nga Agjencioni Kadastral i Kosovës në bashkëpunim me zyrën kadastrale të Komunës së Hanit të Elezit, organizuan Debat Publik me pronarët e banesave dhe lokaleve afariste të komunës së Hanit të Elezit lidhur me projektin “Regjistro ndërtesën, banesën apo lokalin tuaj”
Projektin “Regjistro ndërtesën, banesën apo lokalin tuaj” para qytetarëve prezentë në këtë debat e prezantoi znj.Mejreme Bajrami, kryetare e Komisionit për Regjistrim në Agjencionin Kadastral të Kosovës e cila tha se regjistrimi i pronës do të ju mundëson pronarëve që prona e tyre të bëhet objekt i sigurt të transaksioneve dhe hipotekave, me qëllim të marrjes së kredive për zhvillim ekonomik dhe bizneseve familjare.
Ndërsa Qazim Sinani, Menaxher i projektit tha se gjatë muajve Mars dhe Prill do të mblidhen të gjitha të dhënat për banesat apo lokalet afariste për regjistrimin e tyre në Regjistrin e të Drejtës Banesore të Paluajtshme(Kadastrin e Banesave). Ai ftoi të gjithë të interesuarit të shfrytëzojnë këtë mundësi për regjistrimin e pronave të tyre pa as një shpenzim nëse bëhet brenda afatit.
Zekirija Elezi në emër të kompanisë “Geoprojekt” e cila është e autorizuar nga Agjecioni Kadastral i Kosovës për implementimin e këtij projekti, tha se i procesi i regjistrimit do të zgjasë 10 muaj dhe i njoftoi të pranishmit me procedurat e regjistrimit. Ai tha se nga pronarët do të kërkohet të përgatitin dhe të dorëzojnë te kompania dokumentacionin që dëshmon pronësinë e tyre, origjinalin apo kopjen e vërtetuar në komunë së bashku me aplikacionin e plotësuar. Zyrtarët nga kjo kompani do të vizitojnë së paku dy herë pronarët nëpër banesat apo lokalet e tyre për ti mbledhur aplikacionet dhe dokumentet e tyre. Një zyrtarë nga kjo kompani gjatë gjithë kohës të implementimit të projektit do të jetë në dispozicion të palëve dhe do të jetë i vendosur në zyrën për Urbanizëm dhe Kadastër të komunës së Hanit të Elezit.
Në emër të komunës së Hanit të Elezit të pranishmëve në debat iu drejtua Drejtori i DUK-së Miqail Vila i cila tha se pjesë e këtij projekti është edhe Drejtoria për Urbanizëm dhe Kadastër e komunës së Hanit të Elezit dhe do të jetë gjatë gjithë kohës së implementimit të projektit në shërbim të palëve në mënyrë që projekti të përfundojë me sukses dhe në interes të qytetarëve të komunës së Hanit të Elezit.
Zyra për Informim
