Hani i Elezit 05.11.2013
Kryetari i komunës së Hanit te Elezit, z.Rufki Suma me rastin e rizgjedhjes për mandatin e ri 4 vjeçar, në një manifestim rasti iu drejtua banoreve të komunës së Hanit të Elezit në tubimin falënderues i cili është mbajtur para shtëpisë së Kultures “Imri Curri”.
Të pranishmit në këtë tubim ishin qindra e qindra banorë komunës së Hanit të Elezit të cilët edhe një herë me prezencën masive deklaruan përkrahjen e tyre për kryetarin e rizgjedhur Rufki Suma.
Në fjalimin e tij para qytetarëve kryetari Suma tha:
Të nderuar qytetarë të komunës së Hanit të Elezit, të nderuar pjesëmarrës
Pas një muaji fushate të lodhshme e të mundimshme, jam shumë i sigurt se sot nuk do të ketë nevojë për shumë fjalime.
Megjithatë në pamundësi që të ju falënderojë individualisht të gjithë juve, zgjodha këtë tubim që të shprehi respektin më të sinqertë për kontributin e juaj për një proces të shkëlqyeshëm zgjedhorë.
Ju të nderuar banorë të komunës së Hanit të Elezit dhatë edhe një herë provimin e demokracisë së mirëfilltë, dhatë shembullin më të mirë të fuqisë së votës së lirë dhe fuqisë së vullnetit të lirë të qytetarit.
Qytetarët e komunës së Hanit të Elezit dhanë shembullin për tërë Kosovën se janë të gatshën të marrin pjesë në proceset e vendimmarrjes dhe të jenë përgjegjës për vendimet e marra.
Respekt të veçantë meritojnë edhe të gjitha subjektet politike dhe kandidatët e tyre të cilët kontribuan që i tërë procesi zgjedhorë të kalojë në mënyrën më të mirë të mundshme dhe unë urojë të gjithë ata që morën pjesë në këtë garë dhe u zgjodhën me votat e juaja .
Shfrytëzojë rastin në veçanti të falënderojë dy subjektet politike AAK-në dhe Lëvizjen Vetëvendosje të cilat duke vlerësuar të arriturat gjatë mandatit të kaluar vendosën që të përkrahin kandidaturën time edhe për mandatin e ardhshëm për kryetarë të komunës.
Dalja e juaj në numër aq të madh është mesazhi i juaj shumë i qartë për të gjithë ne që hymë në këtë garë zgjedhore, se ju jeni ata që me votat e juaj, me bindjen dhe vullnetin e juaj të lirë do të vendosni për të ardhmen e juaj .
Ky mesazh për mua është edhe më i qartë se ju jeni ata para të cilëve të gjithë ne duhet të japim llogari për punët, angazhimet, sukseset dhe dështimet.
Të jesh kryetarë i komunës për mua në as një moment nuk ka qenë dhe nuk do të jetë privilegj, por përgjegjësi. Përgjegjësi para juve qytetarëve të nderuar që me plotë të drejtë prisni nga ne që të jemi bartës të zhvillimit ekonomik dhe mirëqenies sociale i barabartë për të gjithë pavarësisht bindjeve politike apo çfarëdo dallimi tjetër.
Nuk ka qenë në kulturën time politike dhe njerëzore të dalë para jush me premtime, por është në kulturën time të pranojë se nga mandati i shkuar kemi nxjerrë shumë mësime dhe të zotohem para jush se do të angazhohem me tërë kapacitetin tim që komunën e Hanit të Elezit ta presin edhe shumë projekte të rëndësishme dhe zhvillim ekonomik që do të ndikojnë në jetë e secilës familje të komunës së Hanit të Elezit.
Asgjë nuk ju premtoj se do ta bëjë, por e vetmja gjë që ju premtoj është se do ta jap maksimumin për t’iu shërbyer juve. Ndaj me sinqeritetin më të madh iu konfirmoj se pozita që ju më dhatë më shumë është përgjegjësi se sa privilegj.
Dera e zyrës time do të jetë e hapur për secilin nga ju, ndaj do të mundohem në maksimum t’iu shërbej duke lutur Zotin të na jep te gjithëve shëndet që ti realizojmë projektet që kemi përpara. Ndaj kërkoj nga ju që të ndihmohemi mes vete në të mirë. Thotë Pejgamberi alejhi selam: Zoti është në ndihmën e robit të Tij përderisa robi është në ndihmë të vëllaut të vet.
Andaj ne fund duke ju falënderuar edhe njëherë për maturinë, kulturën e lartë qytetare e politike qe treguat ne zgjedhjet e 3 nëntorit, Ju ftoj për një unitet, tolerancë dhe mirëkuptim mes nesh, sepse vetëm ne ketë mënyrë mund te ecim drejt fitoreve te reja
Këtë fjalim do ta përfundojë me thënien e zotit;
Ndihmohuni mes vete në të mirë dhe devotshmëri e mos u ndihmoni mes vete në të këqija dhe armiqësi
Urime, shëndet e suksese te reja
Të pranishmit në këtë tubim me repertuarin e tij të pasur i argëtoi këngëtari i njohur kosovar Afrim Muqiqi.
Zyra për informim
