Hani i Elezit 14.01.2014
Pas konstituimit me sukses të organeve komunale pas zgjedhjeve lokale, kryetari i komunës Rufki Suma, fillimin e vitit kalendarik e shfrytëzoi që të takohet edhe me kryetarët e fshatrave, vendbanimeve dhe lagjeve urbane të komunës së Hanit të Elezit.
Takimi i cili ishte i pari pas zgjedhjeve lokale me udhëheqësit lokal, kryetari Suma e shfrytëzoi që ti njoftoi pjesëmarrësit mbi zhvillimet në komunën e Hanit të Elezit. Ai me këtë rast tha se komuna e Hanit të Elezit me shumë sukses ka implementuar rezultatet e zgjedhjeve lokale duke konstituuar kuvendin e komunës në afatin e paraparë ligjorë si dhe janë bërë emërimet e stafit ekzekutiv me ç’rast janë krijuar kushte e nevojshma që komuna e Hanit të Elezit vitin 2014 ta filloj me kapacitet të plotë funksionalë.
Për kryetarin Suma këto rrethana janë mundësi e mirë që të fillohen të implementohen projektet të cilat janë identifikuara si projekte me interes për zhvillimin e komunës së Hanit të Elezit. Ai me këtë rast përmendi në veçanti projektet me rëndësi të madhe si rrugën Hani i Elezit-Gorancë, rrugën Paldenicë-Dërmjakë, zgjedhje e problemit të furnizimit me ujë, implementimin e projektit të pastrimit të shtratit të Lumit Lepencë si dhe shumë projekte tjera të cilat janë dakorduara me fshatrat dhe vendbanimet në vitin 2013. Kryetari Suma tha se edhe pse komuna e Hanit të Elezit ka planifikuar shumë projekte, do të jenë vështirë që të realizohen të gjitha për shkak të kufizimeve buxhetore, por shtoi se pret që për këto synime të gjejë përkrahje nga institucionet vendore dhe donatorët potencial.
Këtij takimi me propozime konkrete i kontribuan edhe udhëheqësit lokal. Ata shfrytëzuan rastin që të prezantojnë kërkesa nga komuniteti i tyre me ç’rast e përbashkët ishte problemi me furnizim me ujë, menagjimi me mbeturinat, si dhe propozime konkrete të projekteve të infrastrukturës lokale.
Zyra për Informim
