Kryetari i komunës Rufki Suma dhe Drejtori i Administratës Fari Kalisi pritën sot në takim të përbashkët kryetarët e këshillave lokale të fshatrave, vendbanimeve dhe lagjeve urbane të komunës së Hanit të Elezit.
Takimi i cili ishte i fundit i me këtë përbërje të kryetarëve të këshillave lokale ishte mundësi që të bëhet një analizë e përbashkët e funksionimit të këshillave lokale të fshatrave, vendbanimeve dhe lagjeve urbane të komunës së Hanit të Elezit.
Kryetari i komunës Rufki Suma pasi i njoftoi udhëheqësit lokal lidhur me zhvillimet aktuale në komunën e Hanit të Elezit i falënderoi ata për kontributin dhe angazhimin e tyre që për këto tre vite të mandatit të tyre dhanë për zhvillimet e përgjithshme në komunën e Hanit të Elezit e veçanërisht për komunitetet të cilët i përfaqësonin. Kryetari Suma tha se falë këtij bashkëpunimi janë identifikuar shumë problemet dhe nevoja konkrete të fshatrave, vendbanimeve dhe lagjeve urbane duke mundësuar komunën e Hanit të Elezit që sa më mirë të hartojë planifikimet për investime kapitale. Ai tha se përkundër vullnetit që të reflektojmë sipas kërkesave të komunitetit, disa nga projektet e propozuara nuk janë realizuar ende për shkak të kufizimeve buxhetore, por se ata mbesin prioritet për tu realizuar.
Në anën tjetër edhe kryetarët e këshillave lokale falënderuan kryetarin Suma për bashkëpunimin gjatë këtij mandati dhe ishte vlerësim i përbashkët i tyre se funksionimi i këshillave lokale të fshatrave, vendbanimeve dhe lagjeve urbane në bashkëpunim me komunën e Hanit të Elezit mundë të jetë formë e mirë e komunikimit për të adresuar çështje konkrete dhe të gjenden zgjedhjet më të mira.
Ata u zotuan se do të vazhdojnë të japin kontributin e tyre në interes të komunitetit të cilën përfaqësojnë ashtu edhe në interes të komunës në përgjithësi.
Ndërsa drejtori i administratës Fari Kalisi i njoftoi udhëheqësit lokal lidhur me plotësim ndryshimet e rregullores për organizimin e komunës me këshillat e fshatrave, vendbanimeve dhe lagjeve urbane.
Ai tha se nga përvoja e funksionimit gjatë këtij mandati janë konstatuar disa probleme në funksionimin e kësaj rregulloreje dhe se me plotësim ndryshimet e propozuara ato pritet të eliminohen.
Drejtori Fari Kalisi i njoftoi udhëheqësit lokal se pas miratimit nga kuvendi i komunës të këtyre ndryshimeve do të fillojë procesi i zgjedhjes së këshillave lokale duke kërkuar njëherit nga udhëheqësit lokal që të kontribuojnë që ky proces të zhvillohet sa më mirë.
