Përfaqësues të institucioneve vendore dhe ndërkombëtare, vijuesit e tre gjeneratave të kësaj akademie e shumë mysafir, ishin të ftuar nga Instituti Kosovar për Qeverisje Lokale e cila sot me një ceremoni rasti përmbylli aktivitetet me rastin e diplomimit të gjeneratës së tretë të kësaj akademie.
Besnik Tahiri, Themelues dhe Drejtor Ekzekutiv i KLGI-së tha se Kosova vazhdon të përballet me sfida që po cenojnë konsolidimin demokratik të institucioneve dhe shoqërisë. Një numër i madh i qytetarëve ndjejnë që nuk marrin pjesë aktive në qeverisje, dhe për rrjedhojë, nuk kanë ndikim real mbi jetën e tyre dhe as mbi zhvillimet në komunitet e shoqëri. Agjendat politike të institucioneve qendrore si dhe komunave nuk reflektojnë nevojat dhe pritjet reale të qytetarëve, duke i bërë qytetarët indiferent, dhe hera herës skeptik në lidhje me të ardhmen e tyre dhe të vendit të tyre. Zhvillimet nëpër komuna tregojnë që zëri i qytetarëve shpesh nuk dëgjohet, ankesat e tyre nuk përfillen, pritjet e tyre nuk përmbushen, shërbimet për ta nuk ofrohen. Kjo shpesh rrënon besimin e njerëzve në demokracinë si sistem në përgjithësi, dhe në demokracinë që Kosova po kultivon në veçanti.
Instituti Kosovar për Qeverisje Lokale ka vendosur që duke filluar nga viti 2014 të ndajë një çmimin vjetor si vlerësim që i bëhet personaliteteve për përkushtim dhe kontribut të dalluar në fushën e qeverisjes dhe demokracisë lokale.
Për këtë vit ky çmim i ndahet Kryetarit të Komunës së Hanit të Elezit Rufki Sumes, dhe Jaan Brathu, Ambasadori i Mbretërisë së Norvegjisë në Kosovë.
Jaan Braathu, si Ambasador i shquar i një vendi mik, nuk është ndalur në komoditetin e përfaqësimit diplomatik vetëm nga tryezat zyrtare dhe qeveritare. Braathu nëpërmes aktivizmit të tij si diplomat dhe si personalitet vazhdueshëm është përfshirë në tema specifike, në tema që prekin përditshmërinë e qytetarëve dhe jo vetëm në temat e mëdha të bashkësisë ndërkombëtare.
Kryetari i komunës Rufki Suma është shembulli i qeverisjes nëpërmes përfshirjes dhe konsultimit të qytetarëve. Qytetaret e komunës së Hanit të Elezit në krahasim me komunat tjera shfaqin një nivel dukshëm me të lartë të besimit dhe pranueshmërisë për hapat qeverisës të kryetarit të tyre. Respekti i qytetarëve të kësaj komune për kryetarin konfirmon faktin që qeverisja e mirëfilltë demokratike është inkurajim për bashkëpunim më të mirë mes institucioneve dhe qytetarëve. Suma ka krijuar promovuar modelin sipas të cilit qeverisja lokale ka kuptim vetëm atëherë kur para së t’i referohet agjendave të tjera, të shoh se cila është agjenda e qytetarëve për të ardhmen e tyre. Ata vendosin për të ardhmen, derisa qeverisja i shërben asaj.
Mbi këtë motivacion, dhe si praktike e cila vlerëson kontributin e shquar në fushën e demokracisë dhe qeverisjes lokale, Instituti Kosovar për Qeverisje Lokale shpreh mirënjohjen dhe falënderimin e thellë për Sumen dhe Braathu. Shpresojmë që ky çmim i sivjetme, dhe kjo praktike do të inkurajojë sado pak ndryshimet pozitive në Kosovë tha Fatmir Haxholli nga Instituti Kosovar për Qeverisje Lokale në arsyetimin e KLGI-së për vendimin për të nominuar Kryetarin Suma dhe Ambasadorin Braathu.
Të pranishmëve lidhur me sfidat e funksionimit të pushtetit lokal iu drejtuan Kryetari i Komunës së Strugës z.Ziadin Sela, Besnik Osmani Sekretar i përhershëm në Ministrin e Administrimit të Pushtetit Lokal, Jaan Brathu, Ambasadori i Mbretërisë së Norvegjisë në Kosovë, ndërsa në përmbyllje vijuesve të Gjeneratës së tretë të Institutit Kosovar për Qeverisje Lokale iu ndanë Certifikatat e Diplomimit.
Zyra për Informim
