Hani i Elezit 22.11.2013
Në vazhdën e bashkëpunimit në mes të Komunës së Hanit të Elezit dhe Programit të Mbështetjes së Komunave në Planifikimin Hapësinor (MuSPP), i cili zbatohet nga UN Habitat-i dhe financohet nga Sida është nënshkruar “ Marrëveshja e Bashkëpunimit” për realizimin e projektit të investimit kapital “ Rregullimin e qasjes për në shkollën fillore “Ilaz Thaçi” në Han të Elezit”.
Palët nënshkruese të këtij dokumenti ishin Rufki Suma, Kryetar Komunës së Hanit të Elezit, dhe znj. Gwendoline Mennetrier, udhëheqëse e UN Habitat-it në Kosovë.
Kryetari Suma në fillim përshëndeti mysafirët duke iu dëshiruar mirëseardhje dhe shprehur kënaqësinë për takimin. Ai falënderoi UN Habitat-in për mbështetjen e deritanishme në hartimin e planeve zhvillimore (Planin Zhvillimor Komunal dhe Planin Zhvillimor Urban), Planit Rregullues urban për Qendrën dhe Lagjen e Parkut si dhe për mbështetjen në realizimin e projektit kapital për rregullimin e qendrës së qytetit.Ai vlerësoi lartë edhe rëndësinë e projektit në fjalë për të cilin po nënshkruhej edhe marrëveshja për realizimin e tij.
Edhe Znj.Mennetrier gjithashtu falënderoi kryetarin Suma për bashkëpunimin e deritanishëm në mes të dy palëve duke vënë në pah aktin e nënshkrimit të kësaj marrëveshje si një shenjë pozitive të vazhdimit të bashkëpunimit edhe në të ardhmen.
Projekti për “Rregullimin e qasjes drejt shkollës fillore në Han të Elezit”, përveç rregullimit të rrugës, projekti ngërthen në vete edhe rregullimin sipërfaqësor, rregullimin e kanalizimit atmosferik, rregullimin e kanalizimit fekal, rregullimin e një hapësire brenda oborrit të shkollës për fëmijët parashkollorë, rregullimin e rrethojës së shkollës ku ajo mungon, vendosjen e elementeve gjelbëruese (bar dhe drunjë) në hapësirat pranë, si dhe vendosjen e elementeve urbane (ulëse dhe shporta mbeturinash). Realizimi i këtij projekti pritet të fillojë në fillim të vitit të ardhshëm ndërsa kostoja e këtij projekti është planifikuar të jetë rreth 50.000.oo euro përderisa financimi i tij do të bëhet nga të dy palët me bashkëpjesëmarrje të barabartë.
Pas kryerjes së procedurave formale të nënshkrimit të marrëveshjes takimi vazhdoi me diskutimet rreth projekteve tjera të përbashkëta që janë në realizim e sipër si dhe projekteve të mundshme për tu realizuar në të ardhmen. Përfaqësuesit nga UN Habitat-i shfrytëzuan rastin edhe për ti uruar z. Suma rizgjedhjen e tij në postin e Kryetarit të Komunës së Hanit të Elezit.
Zyra për informim
