Hani i Elezit 25.08.2011
Delegacion i Komunës Sopishte nga Republika e Maqedonisë me në krye prefektin e kësaj komune Jovan Gorgijovski, dhe Kryesuesin e Kuvendit Fejzo Jakupi vizituan sot Komunën e Hanit të Elezit.
Në takim me kryetarin e Komunës së Hanit të Elezit Rufki Suma ,mysafirët nga Maqedonia prezantuan propozimin që të iniciohet bashkëpunimi ndërmjet këtyre komunave,si formë e bashkëpunimit ndërshtetërorë me qëllim të aplikimit të përbashkët në fondet investive të BE-së për projektet të dedikuara për bashkëpunim ndërkufitarë.
Duke bërë një prezantim të gjendjes aktuale në komunat e tyre të dy kryetarët u dakorduan se kjo është edhe një formë e mirë e bashkëpunimit regjional me projekte me interes të përbashkët dhe se për këtë qëllim do të formohen edhe grupet punuese nga dy komunat që do të identifikojnë se në cilat fusha mundë të aplikohet me ndonjë projekt konkret e që do të ishte në interes të përbashkët.
Komuna e Sopishtes e cila shtrihet në pjesën qendrore të R.Maqedonisë me një sipërfaqe prej 254 km katrorë dhe me 7000 banorë ku 30% janë të komunitetit Shqiptarë ka potencial që të jetë një partnere e mirë e komunës së Hanit të Elezit tha z.Gorgijoski duke i bërë ftesë z. Sumës që të vizitojë këtë komunë dhe ky takim të konkretizohet edhe me Marrëveshje Mirëkuptimi .
Duke iu përgjigjur ftesës së mysafirit z.Suma tha se komuna a Hanit të Elezit ka listën e projekteve dhe beson se një shkëmbim i ideve dhe përvojave do të ishte e mirëseardhur dhe se beson se ky bashkëpunim do të jetë rast i mire qe të iniciohen edhe ma shumë ide dhe forma të një bashkëpunimi ndërkufitar edhe me komunat tjera në dy anë e kufirit.
Zyra për Informim
