Agjencioni për Menagjimin e Emergjencave (AME) në kuadër të projektit ”Përforcimi i Qëndrueshmërisë nga Fatkeqësitë në Komunat e Kosovës”, projekt ky i përkrahur nga UNDP-ja dhe Kryqi i Kuq i Kosovës, realizuan punëtori dy ditore me zyrtarë të komunës së Hanit të Elezit me qëllim të “Analizës dhe vlerësimit të rrezikshmërisë nga fatkeqësitë natyrore dhe fatkeqësitë tjera. Në këtë punëtori morën pjesë edhe zyrtarë nga Policia e Kosovës, Njësisë së Zjarrfikësve dhe nga QKMF “Menduh Kaloshi”.
Fjalën hyrëse lidhur me këtë projekt si dhe rëndësinë e kësaj punëtorie dhe bashkëpunimin e Kryqit të Kuq të Kosovës dhe UNDP-së dhe AME-së në këtë projekt e prezantoi znj.Lirie Tolaj, ndërsa ligjerues ishin z.Hajriz Sejdiu-Drejtor i Departamentit të Gatishmërisë (AME) dhe Mustaf Gashi-Drejtor i Departamentit Operativ në AME.
Në fjalën hyrëse zyrtarët e lartë të AME-së thanë se emergjencat përbëjnë situatë serioze, të papritur dhe zakonisht të rrezikshme që kërkon veprim të menjëhershëm e që kryesisht vijnë nga fatkeqësitë, që nënkuptojnë dukurinë e shkaktuar nga fuqitë e pakontrolluara natyrore dhe nga fuqi të tjera, që e rrezikojnë jetën apo shëndetin e njerëzve, të shtazëve si dhe pasurinë, që shkaktojnë dëme në trashëgiminë e kulturës dhe të natyrës, si dhe në mjedis në atë masë që për kontroll dhe për mbizotërim është e nevojshme të përdoren masat, forcat dhe mjetet e posaçme. Me emergjenca potencialisht mund të përballet dhe është i rrezikuar çdo vend, pavarësisht pozitës gjeografike. Kosova nuk bën përjashtim në këtë dimension të rregullimit me strategji dhe ligje të kësaj problematike. Me një kuadër të konsoliduar ligjor, institucionet përgjegjëse kanë nxjerrë edhe dy strategji lidhur me situatat emergjente, e që përfshihen në: “Sistemi i Integruar i Reagimit ndaj Emergjencave” dhe “Plani i Reagimit Kombëtar”.
Veç rregullimit në nivel kombëtar, edhe komunat duhet hartuar plane komunale të reagimit ndaj emergjencave të ndryshme, në mënyrë që të sigurohen kapacitete për reagime në situata emergjente në aspektin strukturor dhe organizativ të drejtorive komunale.
Në punëtori u prezantuan metodologjitë për Hartimin e planit të Menaxhimit të Emergjencave duke u ndalë veç e veç në analizat mbi parandalimin dhe zvogëlimin e rreziqeve, analiza e rrezikut si dhe identifikimi i rreziqeve. Komuna e Hanit të Elezit, respektivisht Drejtoria për Shërbime Publike dhe Emergjencë Civile është në fazën përfundimtare të hartimit të Planit të Vlerësimit të Rrezikut. Ky plan i detajuar, përfshinë informata të duhura qoftë demografike, infrastrukturore, e deri te vlerësimet e rrezikshmërisë nga fatkeqësitë natyrore dhe fatkeqësitë tjera. Vlerësimet e rrezikshmërisë janë bërë për këto kategori, sigurisht që janë parë potencialisht më të mundshme: zjarret malore-fushore, vërshimet, tërmetet, erozionet, fatkeqësitë tekniko-teknologjike, rrezikshmërinë për transportin rrugor, vlerësimin e rrezikshmërisë për epidemi etj.
Kjo punëtori është realizuar në kohën e duhur dhe do të shfrytëzohet që ky plan të plotësohet me detaje, duke përfshirë lokacionet, numrin e banorëve, sipërfaqen e mundshme të vërshimeve, strehimoret dhe resurset për angazhim si dhe të përmban edhe skenarë të mundshëm të ngjarjeve dhe situatave emergjente.
Zyra për Informim
