Hani i Elezit 31.10.2014
Këshilli Komunal për siguri në Bashkësi e komunës së Hanit të Elezit mbajti mbledhjen e rregullt për muajin Tetor.
Gjendja e përgjithshme e sigurisë në komunën e Hanit të Elezit vazhdon të mbete e qetë dhe stabile, ishte vlerësim i përgjithshëm i KKSB-së të cilën e kryesoi kryetari i komunës Rufki Suma.
Këtë konstatim e konfirmoi edhe komandanti i stacionit Policorë në Han të Elezit toger Nuhi Dema. Ai tha se numri i rasteve të raportuara gjatë muajit Tetor është 8 raste për dallim nga 12 të raportuara gjatë muajit shtator duke shtuar se këto raste nuk mundë të vlerësohen si raste që kanë cenuar gjendjen e përgjithshme të sigurisë në komunën e Hanit të Elezit.
Togeri Dema me këtë rast falënderoi edhe komunën e Hanit të Elezit për implementimin me sukses të projektit të monitorimit me kamera të Hanit të Elezit dhe shenjëzimit dhe emërimit të rrugëve të komunës së Hanit të Elezit. Ai shtoi se këto projekte do të jenë ndihmesë e madhe për stacionin policorë në Han të Elezit dhe do të kontribuojnë shumë në sigurinë e përgjithshme.
Edhe z.Liman Ramadani Shef i Operativës në pikën kufitare në Han të Elezit e vlerësoi gjendjen e sigurisë si të qetë dhe stabile. Ai tha se qarkullimi në këtë pikë kufitare gjatë muaji Tetor është më i vogël dhe se nuk janë regjistruar raste të ndonjë cenimi serioz të rendit dhe qetësisë publike.Po ashtu edhe nga policia e Vijës së Gjelbërt nuk është raportuar për ndonjë rast të cenimit të vijës kufitare. Vahid Hyseni nga Policia e vijës së gjelbërt tha se kjo njësi është duke i realizuar me sukses planet operative për të parandaluar të gjitha aktivitet negative në përgjegjësi të kësaj njësie.
Ndërsa z.Ali Vishi nga FSK-ja i njoftoi anëtarët e KKSB-së me aktivitetet e Forcës së Sigurisë së Kosovës. Ai tha se Kompanitë e Deminimit dhe të Batalionit të Xhenios janë duke operuar pa ndërprerë në gjithë vendin me qëllim të sigurimit të një ambienti sa më të sigurt për qytetarët e Kosovës.
Hebib Dërnjani nga Aleanca e Biznesit të Komunës së Hanit të Elezit i njoftoi anëtarët e këshillit lidhur me ecurinë e punimeve të ndërtimit të shtëpisë në fshatin Gorancë e cila po realizohet me kontribute vullnetare nga bizneset e komunës.Ai tha se punët janë në përfundim e sipër dhe se familja Berisha së shpejti do ti gëzohet shtëpisë së re. Kryetari i Aleancës së Biznesit z.Dërnjani tha se me një bashkëpunim dhe koordinim më të mirë të bizneseve, komunës dhe individëve të vullnetit të mirë, vitin e ardhshëm mundë të kontribuojmë edhe në ndërtimin e shtëpive tjera.
Duke kontribuar në këtë takim kryetari Suma i njoftoi anëtarët e KKSB-se edhe me disa projekte të cilat do të implementohen në komunën e Hanit të Elezit gjatë muajit Nëntor. Ai tha se gjatë këtij muaji do të zhvillohen dy procese të rëndësishme, si Procesi i Regjistrimit të Bujqësisë dhe Procesi i Rindërtimit të Zonave Kadastrale në fshatrat Paldenicë, Seqishtë e Gorance. Ai kërkoi nga anëtarët që të promovojnë dhe mbështesin këto projekte me rëndësi të madhe për qytetarët.
Kryetari Suma në takim u ndal edhe në zhvillimet të cilat përcollën ngjarjen sportive të zhvilluar në Beograd ndërmjet Kombëtares së Shqipërisë dhe të Serbisë.
Fatkeqësisht, tha kryetari Suma, edhe një herë u dëshmua urrejtja e skajshme e shtetit Serb ndaj çdo gjëje që është Shqiptare. Para syve të të gjithë botës ata demonstruan mungesën e respektit minimal ndaj kombëtares sonë, himnit e flamurit tonë. Serbët, një ngjarje që duhej të ishte vetëm sportive e shëndrruan në shfrenim të urrejtjes ndaj shqiptarëve dhe simboleve tona.
Mirëpo ajo që ndodhi gjatë ndeshjes na bëri që të gjithë të ndjehemi krenarë. Kombëtarja e jonë edhe në ato rrethana të tmerrshme ishte e denjë në fushën e sportit por edhe më e denjë në mbrojtjen e vlerave kombëtare duke mbrojtur simbolet tona kombëtarë. Reagimi i të gjitha lojtarëve pa dallim në rrethanat kur edhe jeta e tyre ishte drejtpërdrejt e rrezikuar dëshmuan përkushtimin e tyre patriotik ndaj vlerave dhe simboleve tona kombëtare tha z.Suma.
Vendimet e UEFA-së të cilat pasuan nga ata që me shumë zë promovojnë luftën kundër racizmit dëshmuan dyftyrësin politike të tyre kur janë në fjalë shqiptarët.
Kryetari Suma me këtë rast shprehu edhe indinjatën e tij ndaj të vetëquajturve “Analist” të cilët me deklaratat e tyre po dëshmojnë mungesën e respektit minimal të vlerave kombëtare.
Zyra për Informim
