Hani i Elezit 26.02.2014
Qytetarët e komunës së Hanit të Elezit me manifestim madhështorë shënuan 15 Vjetorin e Ditës së Krismës së Pushkës së Parë në Han të Elezit.
Në Homazh te Varrezat e Dëshmorëve në Puset e Nikës morën pjesë përfaqësues të institucioneve publike, Shoqatave të dalura nga Lufta e UÇK-së, anëtarë të familjeve të Dëshmorëve e shumë qytetarë nga Hani i Elezit dhe vende tjera të Kosovës të cilët vendosën buçetë lulesh dhe u përkulën para veprës së Dëshmorëve të Komunës së Hanit të Elezit.
Manifestimi Përkujtimorë u mbajt në Shtëpinë e Kulturës “Imri Curri” ku të pranishëm ishin shumë qytetarëve, mysafirë të ftuar, Familjarë të Dëshmorëve, Veteranë të luftës së UÇK-së, përfaqësues të Policisë së Kosovës e të FSK-së.
Shënimin e 15 vjetorit të Krismës së Pushkës së Parë në Han të Elezit e nderuan me prezencën e tyre simboli i rezistencës kombëtare z.Adem Demaçi, Kryetari i Komunës së Kaçanikut z.Besim Ilazi dhe Kryetari i Shoqatës së Familjeve të Dëshmorëve të UÇK-së z.Xhavit Jashari .
Në hapjen e këtij manifestimi me fjalë rasti të pranishmëve ju drejtua Ish Komandanti i Brigadës 164 “Gafurr Loku” dhe tani Kryetarë i Komunës së Hanit të Elezit Rufki Suma.
Duke përshëndetur të pranishmit z.Suma tha se në kohën kur shënojmë këtë datë, kujtojmë luftën e lavdishme të UÇK-së, luftën dhe sakrificën e gjithë atyre që luftuan dhe u flijuan që ne sot të kremtojmë të lirë. Pikërisht sot bëhen 15 vite kur njësiti i UÇK-së në Puset e Nikës, shkrepi pushkët e lirisë, duke u ndesh me forcat ushtarako policore serbe të cilët tentuan që ti fusin në rrethim dhe ti zhduknin forcat e UÇK-së në Puset e Nikës.Të nderuar të pranishëm, edhe pse Hani i Elezit ka një numër të vogël të banorëve, kontributi i qytetarëve të saj ishte jashtëzakonisht i madh, sepse qytetarët e kësaj treve, e në veçanti rinia e kësaj ane mori pjesë aktive në të gjitha frontet e luftës jo vetëm në Kosovë por edhe në Luginë të Preshevës, dhe Luftën e Ushtrisë Çlirimtare Kombëtare në Maqedoni, ku për çlirimin e trojeve shqiptare dha 13 dëshmorë dhe dhjetëra invalid .
Të nderuar të pranishëm, sot po shënojmë një datë të rëndësishme, festojmë të lirë, po punojmë të lirë, falë luftës së UÇK-së, Dëshmorëve tanë dhe sakrificës së invalidëve dhe luftëtarëve të UÇK-së, datë e historisë së re të Hanit të Elezit për të cilën ndihemi krenarë të gjithë.
Fatkeqësisht edhe pas 15 viteve institucionet më të larta të shtetit ende nuk miratuan një Ligj që do të shpërblente Luftëtarët e UÇK-së, dhe të trajtohen ashtu siç e kanë merituar tha z.Suma. Të nderuar ushtarë ju dhe ne bashkërisht e bëmë punën tonë. Me ndihmën e aleatëve çliruam vendin tonë. Me 11 qershorë të vitit 1999 ushtarët tonë ishin të parët që mirëpritën forcat e NATO-s tha ndër të tjerat z.Suma.
Të nderuar të pranishëm, të nderuar vëllezër dhe motra, unë kënaqem kur vie këtu te ju, e ndiej veten ashtu si në atë Shqipërinë e dikurshme të cilën e kam ëndërruar në ato qelit e burgut në vitet e gjata, këtu po ndihem si në një Shqipëri të vogël tha simboli i rezistencës kombëtare z.Adem Demaçi duke marrë fjalën për të përshëndetur të pranishmit në këtë manifestim.
Nëse ne nuk do të jemi të zotët të kërkojmë të drejtat tona që na takojnë, të tjerët nuk do të mërziten për ne. Vetëm ata popuj të cilët kërkojnë liri të plotë për vete, vetëm ata do ta fitojnë këtë liri, prandaj mos pushoni kurrë, mos u frigoni kurrë të kërkoni liri të plotë, mos u kënaqni me pak, por të vazhdojmë të kërkojmë atë që na takon. Duhet të marrim shembull nga popujt të vegjël por të përparuar. Duhet të marrim shembull nga Norvegjezët, Suedezët, Finlandezët, Danezët,të cilët janë të organizuar dhe të përparuar. Lavdi gjithë heronjve tanë, Dëshmorëve tanë, lavdi gjithë atyre që në çfarëdo mënyre e ndihmuan kryengritjen tonë, lavdi edhe të gjithë juve të cilët jeni gjallë dhe të cilët mendoni me vazhdue më tutje realizimin e të drejtave tona tha z.Demaçi.
Shënimi i përvjetorit të 15-të i Ditës së Krismës së Pushkës së Parë në Han të Elezit ishte rast edhe për promovimin e Librit “Jatakët e Lirisë” të autorit Shaban Çupit.
Autori Shaban Çupi tha se me librin “Jatakët e Lirisë” është munduar që të dokumentojë rezistencën e atdhedashësve të trevës së Hanit të Elezit të cilët me veprimtarinë e tyre ishin në krahë të lirisë dhe të çlirimit të atdheut, andaj në vigjilje të 70 vjetorit të burgosjeve të tyre të nxjerrim në dritë këtë vepër e cila i kushtohet Islam Bravës, Nazmi Bravës, Rufat Bravës, nga fshati Puset e Nikës si dhe Halili Rogaqit e Ali Hunelit nga fshati Rezhancë dhe Shefket Thaçit nga fshati Kryenik të komunës së Hanit të Elezit të cilët në momentet më të vështira strehuan dhe ndihmuan kaçakët, konkretisht kryengritësin Avdyl Durën me shokë.
Autori Çupi tha se Jatakët e Lirisë është mbështetur në të dhënat arkivore të marra nga Arkivi Shtetëror i Republikës së Kosovës, burimet familjare dhe burime tjera shkencore të botuar nga autorë të ndyshëm.
Në nderë të promovimit të Librit “Jatakët e Lirisë” Kryetari i Komunës së Hanit të Elezit Rufki Suma për kontributin kombëtarë ndau Postmortum “Mirënjohje” për veprimtarët Islam Brava, Nazmi Brava, Rufat Brava, Halil Rogaqi, Ali Huneli e Shefket Thaçi të cilët u morën nga trashëgimtarët e tyre.
Shënimi i përvjetorit të 15 i Ditës së Krismës së Pushkës së Parë në Han të Elezit u përmbyll me program muzikorë të përgatitur nga SHKA “ Sharri” nga Hani i Elezit.
Zyra për Informim
