Hani i Elezit 26.02.2013
Qytetarët e komunës së Hanit të Elezit përkujtuan 14 Vjetorin e Ditës së Krismës së Pushkës së Parë në këto troje. Pas Homazhit te Varrezat e Dëshmorëve në Puset e Nikës ku përfaqësues të institucioneve publike, qytetarë dhe Shoqatave të dalura nga Lufta e UÇK-së vendosën buçetë lulesh dhe u përkulën para veprës së tyre, Manifestimi Përkujtimorë u mbajt në Shtëpinë e Kulturës “Imri Curri”.
Para shumë qytetarëve, mysafirë të ftuar, Familjarë të Dëshmorë,veteranë të luftës së UÇK-së, me fjalë rasti ju drejtua Ish Komandanti i Brigadës 164 “Gafurr Loku” dhe tani Kryetarë i Komunës së Hanit të Elezit Rufki Suma.
Duke përshëndetur të pranishmit përfaqësuesit e FSK-së, Policisë së Kosovës , zv ministrin e MPMS z, Berat Luzha, Përfaqësuesit e Zyrës për trashëgimi Kulturore, të TMK-së, dhe pjesëmarrësit tjerë në këtë tubim z. Suma tha se në kohën kur shënojmë këtë datë, kujtojmë luftën e lavdishme të UÇK-së, luftën e komandantit legjendar Adem Jashari, luftën dhe sakrificën e gjithë atyre që luftuan dhe u flijuan që ne sot të kremtojmë të lirë. Pikërisht sot bëhen 14 vite kur njësiti i UÇK-së në Puset e Nikës, shprepi pushkët e lirisë, duke u ndesh me forcat ushtarako policore serbe të cilët tentuan që ti fusin në rrethim dhe ti zhduknin forcat e UÇK-së në Puset e Nikës. Ky njësit i udhëhequr nga komandant Hoxha mori hakun e Gafurr e Driton Lokut, që pushtuesi serb i kishte vrarë vetëm 5 ditë më parë. Nga këto luftime mbeten të vrarë e të plagosur disa ushtarë e polic serb, ndërsa nga luftarët e lirisë u plagos lehtë një ushtar. Nga dështimi i tyre për ti asgjësuar forcat e UÇK-së në Puset e Nikës, okupatori serb ndërmori një ofensivë të gjerë mbi pozicionet e UÇK-së mbi këtë fshat, kështu që me 2 dhe 3 mars të vitit 1999, rreth 70 ushtarë të UÇK-së u përballën me mbi 7000 forca ushtarake dhe policore serbe, të cilat nga orët e hershme të mëngjesit e që vazhduan gjatë tërë ditës granatuan dhe sulmuan pandërprerë pozicionet e UÇK-së, por edhe përkundër kësaj lufte të pabarabartë, ku raporti i forcave ishte 100 me 1 në favor të forcave serbe, serbet pësuan humbje te mëdha si ne njerez ashtu edhe ne teknik luftarake, ndërsa ne radhët e UÇK-së kishim dy të vrarë dhe dy të plagosur.
Të nderuar të pranishëm, edhe pse Hani i Elezit ka një numër të vogël të banorëve, kontributi i qytetarëve të saj ishte jashtëzakonisht i madh, sepse qytetarët e kësaj treve, e në veçanti rinia e kësaj ane mori pjesë aktive në të gjitha frontet e luftës jo vetëm në Kosovë por edhe në Luginë të Preshevës, dhe Luftën e Ushtrisë Çlirimtare Kombëtare në Maqedoni, ku për çlirimin e trojeve shqiptare dha 13 dëshmorë dhe dhjetëra invalid .
Betimi i ushtarit të UÇK-së ishte…"Betohem se do të luftoj për çlirimin e tokave të pushtuara të Shqipërisë dhe bashkimin e tyre.." andaj lirisht mund të themi amaneti i dëshmorëve dhe i luftarëve të lirisë ende nuk është përmbushur në tërësi, ende edhe 14 vite pas luftës një pjesë e çliritarëve dergjen nëpër burgje, ende nuk kemi ligj i cili mbron dhe u jep benificione luftarëve të Lirisë, andaj nga këtu në emër të të gjithë luftarëve dhe në emër të komunës u drejtohemi institucioneve më të larta të vendit që të kujdesen më tepër për ata kategori të luftës që kontibuan për këtë ditë që ne të kremtojmë dhe festojmë në liri tha z.Suma.
Në këtë manifestim, në nderimi për personalitetin dhe veprimtarinë e atdhetarit të madh Dëshmorit Gagurr Lokut është bërë promovimi i Librit “Në kthetrat e UDB-së” të autorit Shaban Çupit.Ai me këtë rast tha se:të shkruash për veprimtarinë e dëshmorëve para se gjithash është një nderë sepse ata krijuan historinë. Ata me mundin dhe sakrificën e tyre, treguan se për të qenë të lirë dhe të dinjitetshëm duhet dhënë më të shtrenjtën, pra edhe jetën. Luftërat, betejat dhe përtalljet e tyre me pushtuesin, gjithë herë do të mbeten tema për studim e trajtim, andaj kësaj radhe lexuesit dhe historiografisë shqiptare ua sjellim dramën ,, Në kthetrat e UDB-së ’’ e cila i kushtohet dëshmorit Gafurr Loku i ekzekutuar nga pushtuesi serb më 21 shkurt 1999 në fshatin Paldenicë të Hanit të Elezit.Pse kjo Dramë dhe pse me emrin e dëshmorit Gafurr Loku? E para: Sepse është e mbështetur plotësisht mbi dokumente sekrete të UDB-së dhe në brendësinë e saj përmban tërë dramaticitetin e vuajtjeve dhe torturave çnjerëzore deri në çmenduri, që u bënë mbi të. E dyta, autori, aktori dhe vetë historia në këtë dramë është pikërisht Gafurr Loku dhe me qëndresën e tij përballë pushtuesit ai shkroi shumë drama të tilla dhe si askund tjetër në këtë dramë, lexuesi e kupton se sa e vështirë ishte që në Jugosllavinë e Avnojit të ishe një atdhetarë që e donë atdheun tënd, një veprimtar që donë të krijosh shtetin tënd, një qytetar që dëshiron të jetosh i lirë në lirinë e dhuruar nga vetë Zoti i Gjithësisë. Në rrjedh të kësaj, ne nuk bëmë gjë tjetër, pos që shpalosëm qëndresën heroike të dëshmorit Gafurr Loku përballë kthetrave të UDB-së gjakatare jugosllave dhe nga veprimtaria e tij e gjerë atdhetare. Lexuesit, historianët, analistët, psikologët dhe regjisorët e teatrove tona kombëtare tanimë kanë në duar një vepër të tillë me kryepersonazhin, dëshmorin Gafurr Loku i cili veprimtarinë atdhetare e filloi në majin e vitit 1968 për t`u ndërprerë dhunshëm nga plumbat e pushtuesit serb më 21 shkurt të vitit 1999, tha z. Çupi .
Ekzeplarin e parë të këtij libri iu dha shokut më të ngushtë të Dëshmorit Gafurr Lokut z. Rafi Halilit. Ai me një fjalim emocionues revokoi çastet e kaluar me Dëshmorin Gafurr Lokun duke e vlerësuar atë si nismëtarin e aktiviteve për çlirimin e popullit dhe trojeve Shqiptare .
Të pranishmëve me një fjalë rasti iu drejtua edhe zv ministrin e MPMS z, Berat Luzha i cili tha se kam nderin të ju përshëndes ne emër te institucioneve të Republikës së Kosoves.
Tash e 14 vjet me parë edhe në këtë treve u ndez lufta e lavdishme çlirimtare e cila me shumë flijime dhe gjak të derdhur u shpagua me lirin e pritur me shekuj. Kjo treve e cila sot përfaqëson komunën e suksesshme të Hanit të Elezit ka dhënë kontribut të çmuar gjatë luftës së lavdishme të UÇK-së. Sot kjo komunë rritet dhe zhvillohet e lirë kurse Hani i Elezit po shëndrohet në një qytet modern e bashkëkohorë me ekonomi të zhvilluar dhe infrastrukturë moderne. Sot kemi në dorë një libër që i kushtohet një personaliteti të madh të kësaj ane dhe dëshirojë ti them disa fjalë: çka mundë të premtojë një atdhetarë më shumë se jetën e vet dhe atë e dha për lirin e vendit të tij, tha ndër të tjerat z. Luzha.
Manifestimi me rastin e 14 Vjetorit të Krismës së Pushkës së Parë në Han të Elezit u përmbyll me program muzikorë të përgatitur nga SHKA,,Sharr" nga Hani i Elezit ku me pika të zgjedhura u prezantuan solistët Shefket Beqa, Avni Bushi, Xhilsime Bushi, Valdete Kalisi ndërsa grupi i vallëtarëve u prezantua me vallen " Qendresa Dardane"
Zyra për Informim
