Këshilli komunal për siguri në bashkësi mbajti sot mbledhjen e fundit për vitin 2012 me që rast vlerësoi gjendjen e përgjithshme të sigurisë në komunën e Hanit të Elezit.
Kryetari i komunës Rufki Suma i cili kryesoi me takimin i njoftoi anëtarët e KKSB-së se Kuvendi i Komunës në seancën e fundit morri vendim për themelimin e KKSB-së në përputhje me Udhëzimin Administrativ që rregullon aktin e themelimit , përbërjes si dhe të funksionimit të KKSB-së në të ardhmen. Ai shtoi se përbërja aktuale është pothuaj se në përputhje me këtë udhëzim por se do të plotësohet me anëtarë të rinj në përputhje me kërkesat e udhëzimit administrativ dhe vendimit të kuvendit të komunës.
Në vazhdim të takimit KKSB-ja vlerësoi zhvillimet në aspektin e sigurisë së përgjithshme në komunën e Hanit të Elezit.
Nga njësia policore e zonës kufitare është njoftuar se që nga 25 dhjetori kemi fluks të shtuar të qytetarëve në këtë vendkalim gjë që ka kushtëzuar angazhim maksimal të stafit . Përkundër këtij numri të madh të udhëtarëve nuk është regjistruar ndonjë shkelje e rëndë e rendit dhe sigurisë publike.
Edhe nga njësia policore e vijës së gjelbërt nuk njoftohet për ndonjë shkelje të rëndë të sigurisë të vijës kufitare. Megjithatë nga të dy njësit policore është apeluar për bashkëpunim më të madh me qytetarët në mënyrë që të parandalohen dukuri apo veprime që mundë të rrezikojnë rendin dhe qetësinë publike.
Në takim anëtarët e KKSB-së dhanë propozime lidhur me përgatitjen e planit të punës për vitin 2013 i cili pritet të miratohet në takimin e radhës.
Vlerësim i anëtarëve të KKSB-së ishte se gjendja e përgjithshme e sigurisë është shumë e mirë por nga ky takim doli edhe apeli i përbashkët për kujdes të shtuar gjatë festës së vitit të ri sidomos në përdorimin e mjeteve piroteknike.
Zyra për Informim
