Me ftesën “Ejani të zgjedhni përfaqësuesit e vendbanimit tuaj” komuna e Hanit të Elezit filloj aktivitetet për të zbatuar në praktikë “Rregulloren për organizimin dhe bashkëpunimin e komunës me Fshatrat, Vendbanimet dhe Lagjet Urbane në territorin e komunës së Hanit të Elezit”. Komunitetet lokale që i popullojnë fshatrat, pjesët urbane dhe vendbanimet kanë një rolë të rëndësishëm në politikë-bërjen komunale andaj zgjedhja e “këshillit lokal” dhe “udhëheqësve të këshillave lokale “ do të ju mundësoj fshatrave, lagjeve urbane dhe vendbanimeve të marrin pjesë në vendimmarrjen komunale, të shprehin nevojat e tyre të veçanta dhe të jenë të informuara mirë lidhur me aktivitetet komunale, zhvillimin komunal dhe shërbimet të jenë më afër qytetarëve të komunës dhe në përputhje me nevojat e tyre.
Zyrtarizimi i kësaj mardhënje po fillon të realizohet në përputhje me rregulloren e miratuar në vitin 2012 nga Kuvendi i Komunës së Hanit të Elezit e cila është hartuar në bashkëpunim të ngushtë me përfaqësuesit e tanishëm lokal, dhe në bashkëpunim me Asociacionin e Komunave të Kosovës, Ministrinë e Administrimit të Pushtetit Lokal dhe me përkrahjen e LOGOS-it.
Banorët e fshatit Krivenik janë të parët të cilët në praktikë implementuan dispozitat e rregullores së re dhe në një proces demokratik zgjedhën këshillin e ri lokal dhe udhëheqësin e këshillit.
Ashtu siç është paraparë në rregullore, banorët me propozimin e tyre vendosën që këshilli i fshatit të përbëhet prej 5 anëtarëve të cilët u votuan me vota të mbyllura nga lista e 10 të propozuarve. Pas zgjedhjes së këshillit të fshatit po ashtu me vota të mbyllura u zgjodh udhëheqësi i këshillit të fshatit . Me shumicë të votash banorët e fshatit Krivenik vendosën që për mandatin e ardhëshëm tre vjeqarë këtë fshat ta përfaqësojë këshilli i zgjedhur me në krye z. Bekim Thaçin.
Për mbarëvajtjen dhe sigurimin e procedurave demokratike për zgjedhjen e këshillit të ri të fshatit Krivenik është kujdesur komisioni i themeluar me vendimin e Kuvendit të Komunës së Hanit të Elezit .
Zyra për Informim
