“Drejt Malit” – Një udhëtim përmes natyrës, historisë dhe sportit në Han të Elezit.
Java e ecjes në natyrë vazhdoi me energji dhe përkushtim në Komunën e Hanit të Elezit, ku nxënësit jo vetëm që shijuan shtigjet malore, por u angazhuan edhe në aktivitete sportive dhe edukative me theks të veçantë në historinë dhe trashëgiminë kulturore.
Han i Elezit
Ky aktivitet është në kuadër të projektit “Drejt Malit” si bashkëpunim i ngushtë mes MKRS-së dhe FSSHK-së, së bashku me donatorët, ku në Han të Elezit nisi me një ecje edukative përmes qytetit, duke vizituar pllakat përkujtimore të dëshmorëve të kombit, parkun “Isa Berisha”, stadiumin “Suad Brava” dhe vendin simbolik të eksodit “Bllaca ‘99”. Nxënësit patën mundësinë të dëgjojnë historitë e këtyre vendeve përmes një guide të organizuar nga Shoqata Alpine e Hanit të Elezit me udhërrëfyesin z. Bedri Bushi, i cili dha kontekst historik dhe natyror gjatë gjithë shtegut.
Në fund të ecjes, u organizuan edhe lojëra sportive dhe aktivitete shoqëruese në natyrë.
Programi “Drejt Malit” mbështetet nga Ministria e Kulturës, Rinisë dhe Sportit dhe zbatohet nga Federata e Sportit Shkollor e Republikës së Kosovës në bashkëpunim me komunat dhe shoqatat komunale të sportit shkollor.
