Data 22 prill njihet si Dita Ndërkombëtare e Tokës dhe kremtohet në mbarë botën me anë të aktiviteteve të ndryshme që sjellin në vëmendje të opinionit publik rëndësinë dhe vlerat e rruzullit tokësor dhe të elementit bazë natyror të tij. Ajo konsiderohet dita e apelimit ndaj problemeve kryesore që lidhen me degradimin e tokës, si rezultat i braktisjes dhe keqpërdorimit të saj, ndotjen nga industritë kimike, erozionit të shkaktuar nga shpyllëzimet masive .
Aktivitete me rastin e Ditës Ndërkombëtare të Tokës u zhvilluan edhe në komunën e Hanit të Elezit. Drejtoria e Arsimit e komunës së Hanit të Elezit në bashkëpunim me institucionet shkollore të komunës, organizuan pastrimin e ambienteve të tyre shkollore dhe të vendbanimeve, lagjeve dhe fshatrave të Hanit të Elezit.
Qëllimi i këtij aktiviteti ishte që të përcillet një mesazh për të gjithë qytetarët e komunës lidhur me rëndësin e madhe që ka mjedisi i pastër dhe i gjelbëruar, dhe në të njëjtën kohë edhe rolin vendimtar që kanë qytetarët kundrejt këtij mjedisi.
Këtë mesazh më së miri e përcollën banorët e Lagjes së Ujit të Thartë të cilët të organizuar nga këshilli lokal i lagjes, duke shfrytëzuar ditët e vikendit dhe motin e mire, pastruan Lagjen e tyre si asnjëher më pare.
Le të jetë aktiviteti e kësaj Lagjeje, shembull i mire i vetiniciativës dhe mirëkuptimit të banorëve për veprime në interes të përbashkët .
Zyra për Informim
