Hani i Elezit 25.07.2013
Avokati i popullit i Kosovës z.Sami Kurteshi, zhvilloi një takim informues me “Këshillin qendrorë për mbrojtjen e të drejtave të punëtorëve dhe shoqërisë aksionare” të ish kombinatit “Sharri” nga Hani i Elezit.
Takimi është realizuar më kërkesën e këshillit në fjalë që të prezantohen para Avokatit të Popullit faktet dhe argumente për të cilat ky këshill konsideron se janë bërë shumë shkelje ndaj të drejtave të punëtorëve si pasojë e privatizimit të këtij kombinati.
Xheladin Laçi kryetarë e këtij këshilli, tha se ky këshill përfaqëson katër njësit punuese të ish kombinatit dhe se flet në emër të mbi 900 punëtorëve prej të cilëve me nënshkrimet e tyre e kanë autorizuar që të iniciojë të gjitha veprimet Ligjore për mbrojtjen e të drejtave të tyre.
Ai tha se që nga procesi i koncesionimit në vitin 2000 kanë filluar shumë veprime me të cilat janë bërë shumë shkelje të të drejtave të punëtorëve dhe për të cilat kanë bërë ankesa në të gjitha instancat, por se fatkeqësisht nuk janë marrë veprime dhe në të shumtën e rasteve as adhe përgjigjeje.
Në prezantimin e kronologjik të këtyre shkeljeve deri në vitin 2013 të mbështetura më të gjitha dokumentet me të cilat ky këshill pretendon se ka dëshmi e fakte, ata theksuan se dëshirojmë të njoftojmë edhe Avokatin e Popullit në mënyrë që të ndikojë me autoritetin dhe ndikimin e tij që kjo çështje të merr një epilogë të merituar ligjorë.
Pasi që i dëgjoi për më se një orë, z.Kurteshi tha se zyra e tij do të vlerësoj se a është kjo çështje brenda mandatit dhe kompetencave të tij dhe se do të njoftohen për veprimet e mëtutjeshme.
Zyra për Informim
