Komisioni qendror shtetëror i maturës shpalli rezultatet e testit të maturës për vitin 2012, ku kalueshmëria është 52.9 për qind në nivel të Republikës së Kosovës.
Në krahasim me këtë mesatare në nivel vendi,maturantët e shkollës së mesme ,,Dardania” nga Hani i Elezit arritën rezultat shumë të mirë në testin e maturës .
Nga 186 maturantët të cilët iu nënshtruan vlerësimit në testin e maturës për vitin 2012, prej tyre 137 kaluan testin, ose shprehur në përqindje 74% arritën normën e kalueshmërisë.
Drejtori i DKA-së Nesim Dernjani tha se rezultatet e testit të maturës në masë të madhe përputhet me arritshmërinë e këtyre nxënësve në fund të vitit shkollorë.
Zëvendësministri i Arsimit, Nehat Mustafa e ka vlerësuar maturën e këtij viti si një ndër më të suksesshmet. Ai ka thënë se në këtë sukses ka ndikuar organizmi i maturës në dy ditë dhe zvogëlimi i lëndëve gjatë një dite. Nga 32 406 maturantë, të cilët u testuan, provimin e kaluan
17145 sish.
Rezultatet janë përpunuar nga Njësia për Standarde, Vlerësim dhe Monitorim dhe janë “rezultate që kemi arritur t’i ndërlidhim nga rezultatet individuale të çdo maturanti nga dita e parë me ditën e dytë të testit, ndërsa përpunimi dhe ndërlidhja e këtyre rezultateve është duke vazhduar, por kjo nuk do të ndikojë në rezultatin final në masë të madhe”.
Në rezultatin pozitiv ka ndikuar edhe zvogëlimi i lëndëve në një ditë të testit, për dallim nga vitet e kaluara, kur në një ditë kanë pasur shtatë ose tetë lëndë, sivjet kanë pasur më së shumti katër lëndë.
Maturantët të cilët në këta afat nuk kanë pasur sukses do të kenë mundësi që në afatin e gushtit t’i nënshtrohen testit të maturës. Data e parë është 30 gushti, kurse data e dytë është 8 shtator.
Nxënësit e pakënaqur me rezultatin mund te parashtrojnë ankesa në Drejtoritë Komunale të Arsimit deri më 10 korrik.
Zyra për Informim
