Sot, me datë 8 dhjetor 2025, para familjes time, anëtarëve të rinj të Kuvendit Komunal, përfaqësuesve të institucioneve, familjarëve të dëshmorëve, përfaqësuesve të organizatave të dalura nga lufta, miqve dhe qytetarëve të tjerë, bëra BETIMIN SOLEMN si Kryetar i Komunës së Hanit të Elezit për mandatin qeverisës 2025-2029:
“BETOHEM se do t’i kryej detyrat e mia dhe do t’i ushtroj kompetencat e mia si Kryetar i Komunës së Hanit të Elezit me nder e besnikëri, në mënyrë të paanshme, me ndërgjegjje dhe në pajtim me ligjet e Republikës së Kosovës, në mënyrë që t’i siguroj kushtet për një jetë më të qetë për të gjithë!”
Rizgjedhja ime si Kryetar i Komunës është nder i madh, por mbi të gjitha është përgjegjësi që qytetarët ma kanë dhënë edhe një herë. Zotohem se në mandatin e ardhshëm, do të përkushtohem për infrastrukturë që i shërben realitetit, hapësira publika të gjelbërta, arsim e shëndetësi më cilësore, zhvillim ekonomik e rural, transparencë e llogaridhënie.
Dua të falënderoj secilin banorë të Hanit të Elezit, e në veçanti ata që kanë besuar tek vizioni im i qëndrueshëm dhe sot falë këtij besimi, sot qëndroj para jush, i bindur që këtë besim tua kthej në realizim të të gjitha punëve që i kam vendosur vetes si obligim për t’i kryer.
Mua më zgjodhen shumica e juaj, por unë do të jem Kryetar i të gjithë juve, i gatshëm të punoj për secilin prej jush: për familjet, për të rinjtë, për të moshuarit, për bizneset, për sportin, për kulturën, e për gjithë të tjerët që presin nga ne stabilitet dhe zhvillim.
Dua të falënderoj administratën komunale për punën dhe bashkëpunimin gjatë mandatit të kaluar, me shpresën se bashkëpunimi do të vazhdojë edhe gjatë këtij mandati.
Për mandatin e ri qeverisës, uroj të gjithë anëtarët e rinj të Kuvendit Komunal, të cilët gjithashtu sot dhanë betimin se do të vendosin interesat publike para interesave personale, për punë me nder e besnikëri ndaj vendit tonë. Urime të veçanta për Kryesuesin e ri të Kuvendit të Komunës, z.Florim Shkreta, i cili mori shumicën e votave për të udhëhequr me Kuvendin Komunal. Përkunder dallimeve politike, unë pres bashkëpunim të ndershëm dhe profesional me anëtarët e Kuvendit. Debati është i shëndetshëm, kundërshtimi është normal, por bllokimi nuk i shërben askujt. Qytetarët na kanë zgjedhur për të punuar.
Në fund, dua të falënderoj të gjithë të pranishmit në ceremoninë e sotme, që më nderuan me pjesëmarrjen e tyre.
FALEMINDERIT!
