Gjatë ditës së djeshme, Komuna e Hanit të Elezit mirëpriti Drejtorin Ekzekutiv të Shoqatës së të Drejtave të Pacientëve në Kosovë, z. Agron Bytyqi, në një takim zyrtar me Kryetarin e Komunës, Mehmet Ballazhi, me rastin e nënshkrimit të memorandumit për themelimin e Këshillit të Pacientëve në Komunën e Hanit të Elezit.
Themelimi i këtij këshilli synon fuqizimin e zërit të qytetarëve në proceset vendimmarrëse lidhur me shërbimet shëndetësore, duke krijuar hapësirë që ata të ndajnë përvojat, nevojat dhe sugjerimet e tyre për përmirësimin e cilësisë së kujdesit shëndetësor në komunë.
Ky bashkëpunim realizohet në kuadër të projektit Accessible Quality Healthcare (AQH), i mbështetur nga Swiss Agency for Development and Cooperation (SDC), dhe paraqet një hap të rëndësishëm drejt një sistemi shëndetësor më gjithëpërfshirës, transparent dhe të orientuar kah nevojat e qytetarëve të Hanit të Elezit.
