Gjilan, 30 Mars 2010 – Misioni i OSBE-së ka lehtësuar një takim pune midis udhëheqësve të komuniteteve në rajonin e Gjilanit dhe zyrtarëve të nivelit qendror për të diskutuar bashkëpunimin e ndërsjellë dhe mundësitë e financimit të projekteve.
Kjo ngjarje ka mbledhur 43 pjesëmarrës nga komuniteti shqiptar, serb, romë, ashkali dhe turk, si dhe organizatat joqeveritare që merren me çështje të komuniteteve joshumicë. Koordinatorë projektesh nga Zyra e Kryeministrit për Çështje të Komuniteteve dhe nga Ministria për Komunitete dhe Kthim kanë prezantuar ftesën për projekt propozime të lëshuara nga zyrat e tyre në vlerë prej 3 milion Euro që kanë për qëllim të trajtojnë nevojat e komuniteteve joshumicë në Kosovë.
Zyrtarët qeveritarë kanë shpjeguar kriteret konkurrrimit dhe procedurat e dorëzimit të projekteve, ndërsa pjesëmarrësit kanë shpalosur projekt idetë e tyre dhe modalitetet e zbatimit. Forcimi i bashkëpunimit midis organeve të nivelit qendror dhe lokal, organizatave dhe përfaqësuesve për funksionalizimin e mekanizmave për promovimin dhe mbrojtjen e të drejtave të komuniteteve, gjithashtu, ishte në fokus të takimit.
Pesë takime me karakter rajonal janë mbajtur në gjithë Kosovën midis 18 dhe 30 marsit me pjesëmarrjen e 146 pjesëtarëve nga të gjitha komunitetet. Këto takime janë vazhdimësi e Trajnimit për të Drejtat e Komuniteteve nga viti i kaluar, ku të njëjtit pjesëmarrës, ishin aftësuar në metodat e zhgjidhjes së problemeve dhe aplikimin e tyre në lokalitetet ku jetojnë.
Misioni i OSBE-së lehtëson takimet e punës midis udhëheqësve të komuniteteve dhe zyrtarëve qendror
