Sot, në Komunën e Gjorçe Petrovit në Shkup, u prezantua pajisja teknologjike e avancuar për monitorimin mjedisor dhe menaxhimin e rreziqeve nga fatkeqësitë natyrore, e siguruar falë një projekti të financuar nga Bashkimi Evropian në kuadër të Programit për Bashkëpunim Ndërkufitar IPA III (2021–2027).
Projekti po zbatohet në partneritet me Komunën e Hanit të Elezit, Ministrinë e Mjedisit dhe Planifikimit Hapësinor të Kosovës, Institutin Ndërkombëtar për Zhvillim dhe Kërkime “Dr. Jugosllav Açkoski” dhe Drejtorinë për Mbrojtje dhe Shpëtim të Maqedonisë së Veriut.
Në prezantimin e sotëm, në prani të kryetarit të Komunës së Gjorçe Petrovit, z. Aleksandar Stojkoski, zv.ministres së Mjedisit znj. Ane Laskoska, zv.drejtorit të Drejtorisë për Mbrojtje dhe Shpëtim z. Kashmir Saliu, si dhe timen si Kryetar i Komunës së Hanit të Elezit – u prezantuan përfitimet konkrete të këtij projekti.
Përmes këtij bashkëpunimi, të dy komunat jemi pajisur me dy kamera inteligjente për monitorimin e hedhjes së mbeturinave dhe deponive ilegale në pikat kritike, sensor për matjen e nivelit të ujit të lumit Lepenec me sistem paralajmërimi për përmbytje në kohë reale, dy dronë për mbikëqyrjen ajrore të terreneve të paarritshme, si dhe një kamion i specializuar për mbështetje logjistike dhe ndërhyrje të shpejta në terren nga ekipet ekologjike komunale.
Si kryetar i Komunës së Hanit të Elezit, më vjen mirë që jemi pjesë e një projekti të tillë që kontribuon drejtpërdrejt në përmirësimin e cilësisë së jetës së qytetarëve tanë, rrit sigurinë dhe nxit një të ardhme më të pastër, më të sigurt dhe më të qëndrueshme për të gjithë ne.
Ky është një shembull i qartë i bashkëpunimit të suksesshëm ndërmjet nivelit lokal e qendror, të mbështetur fuqishëm nga Bashkimi Evropian, edhe atë mes dy shteteve, por që qëllim të përbashkët kanë përmirësimin e jetesës së qytetarëve tanë.
