Në hapësirat e sallës së takimeve të komunës së Hanit të Elezit është prezantuar Raporti Vjetorë për vitin 2014 i Stacionit Policorë të Hanit të Elezit që funksionon në kuadër të Drejtorisë Rajonale- Ferizaj.
Komandanti i Stacionit Policorë në Han të Elezit, Nuhi Dema, e prezantoi raportin e tij para zyrtarëve të lartë të Drejtorisë Rajonale- Ferizaj me në krye kolonel Gazmend Hoxha, drejtorë i kësaj drejtorie, Kryetarit të Komunës së Hanit të Elezit Rufki Suma, kryetarë të këshillave lokale të fshatrave dhe vendbanimeve, përfaqësues të institucioneve publike të komunës së Hanit të Elezit e të ftuar tjerë.
Komandanti Dema tha se zyrtarët e stacionit policorë në Han të Elezit me një personel prej 22 pjestarëve mbulojnë teritorin e kësaj komune me 82 km katrorë me një popullatë prej 9395 banorë. Gjykuar sipas numrit të rasteve të proceduara në vitin 2014 në stacionin policorë të Hanit të Elezit, raporti është pothuaj i përafërt me ato të vitit 2013. Gjithsej vepra penale sipas kodit penal janë regjistruar 87 raste në vitin 2014, ndërsa në vitin 2013, janë regjistruar 83 raste, që paraqet një rritje prej 4.8%. Ndërsa sa i përket numrit total të rasteve të regjistruar (përfshirë të gjitha rastet, Veprat Penale, Kundërvajtjet, Incidentet etj, janë 119 raste në vitin 2014, ndërsa në vitin 2013 ishte 130, që parqet ulje të rasteve të raportuara për -8.5%.
Ndërsa sa i përket zbulueshmërisë në vitin 2014 është se nga 103 raste, 83.8% ose nga 98 raste të raportuara janë zbuluar kurse 19 janë në proces të hetimeve.
Vepër penale kundër pasurisë(Vjedhje, vjedhje të rënda, vjedhje në tentative dhe dëmtim prone) në viti 2014 janë regjistruar 46 raste kundrejt 51 rasteve të regjistruara në vitin 2013, që paraqet ulje prej -9.8%. Vepra penale kundër sigurisë së përgjithshme të njerëzve dhe pasurisë në vitin 2014 janë regjistruar 4 raste, njejtë si në vitin 2013, ndërsa vepër penale të armëve janë 2 raste në vitin 2014.
Nuk ka vepra penale kundër rendit kushtetues dhe sigurisë së Republikës së Kosovës, Lirive dhe të drejtave të njeriut, nuk ka krim të organizuar, vepra penale të narkotikëve apo vepër penale kundër ekonomisë.
Në qytetin e Hanit të Elezit janë regjistruar numri më i madh i rasteve gjithsej 49, pasojnë fshati Paldenicë me 11 raste dhe fshati Seqishtë me 8 raste, tha z.Dema ndër të tjera në raportin e prezantuar. Ai tha se për Stacionin Policorë në Han të Elezit objektiv do të jetë, parandalimin e krimit, ngritja e zbulueshmërisë së veprave penale e realizimit te Urdhëresave të Gjykatave,dhe ngritja e imazhit të PK-së, zbatimi i planit të veprimit të metodologjisë së re, puna sektoriale zbatimi i strategjisë PUI si dhe avancimi i bashkëpunimit me Prokurori, Gjykata dhe institucione tjera. Komandanti Dema përmendi edhe sfidat siç janë mungesa e personelit , mungesa e zyrtarëve civil mungesa në pajisje dhe furnizimi nga logjistika.
Në fundë të prezantimit të raportit Komandanti i Stacionit Policorë në Han të Elezit, Nuhi Dema, falënderoi Komunën e Hanit të Elezit për përkrahjen dhe bashkëpunimin shumë të mirë duke theksuar në veçanti implementimin e projektit të monitorimit me kamera të Hanit të Elezit i cili ka rezultuar si ndihmë e madhe për zyrtarë pranë këtij stacioni tha z.Dema
Drejtori i Drejtorisë Rajonale- Ferizaj, Kolonel Gazmend Hoxha duke përgëzuar për rezultatet e arrituar të zyrtarëve të stacionit policorë në Han të Elezit tha se me vet faktin se numri i rasteve të raportuara është më i vogël është arritje e veçantë.
Ai tha se në Komunën e Hanit të Elezit si vendbanim kufitarë jo të gjitha rastet e raportuara janë të qytetarëve të kësaj komune dhe se nga këto të dhëna mundë të vlerësojmë se niveli i rasteve të raportuar është në suaza të pranueshme.
Ai falënderoi kryetarin e komunës së Hanit të Elezit për bashkëpunimin shumë të mirë me policinë e Kosovës duke e cilësuar si shembullin më të mirë të bashkëpunimit të komunave me Policinë e Kosovës që ka ndikim pozitiv në sigurinë e përgjithshme të qytetarëve.
Ndërsa kryetari i komunës Rufki Suma pasi falënderoi për ftesën që të marrë pjesë në këtë prezantim, tha se përkundër faktit se në disa parametra kishte rënje të rasteve të raportuara kjo nuk duhet të na ndalojë që edhe tutje të angazhohemi në parandalimin e rasteve që rrezikojnë sigurinë e qytetarëve.
Kryetari Suma theksoi bashkëpunimin shumë të mirë me zyrtarët e stacionit policorë në Han të Elezit si për komunikimet ditore por edhe për angazhimin e tyre në KKSB-në. Kur të kemi parasysh se jemi zone kufitare që realisht paraqet rrezik për numër të shtuar të rasteve të mundshme, raporti i prezantuar paraqet një gjendje të mirë. Këto të arritura janë rezultat i punës së personelit të Stacionit Policorë në Han të Elezit duke mos anashkaluar edhe qytetarët që kontribuan në të gjitha aspektet tha kryetari Suma.
Në përfundim të prezantimit të raportit, Komandanti i Stacionit Policorë në Han të Elezit Nuhi Dema nderoi me “Mirënjohje” pjesëtarët e dalluar nga ky stacion për kontributin e tyre në të arriturat dhe avancimin e përgjithshëm të sigurisë publike.
Ndërsa për angazhimin personal të bashkëpunimit të komunës së Hanit të Elezit me Policinë e Kosovës, Drejtori i Drejtorisë Rajonale- Ferizaj, Kolonel Gazmend Hoxha nderoi me “Mirënjohje” Kryetarin e Komunës së Hanit të Elezit Rufki Sumën.
Zyra për Informim
