Hani i Elezit 08.07.2014
Në komunën e Hanit të Elezit sot edhe zyrtarisht ka filluar fushata e korrje-shirjeve. Autokombajnat e para kanë filluar punën në grunajat e fshatit Krivenik, duke nisur kështu fushatën e korrje-shirjeve në komunën e Hanit të Elezit.
Hajrdin Gashi, Drejtori i Drejtorisë për Bujqësi, Pylltari dhe Zhvillim Rural dhe Zyrtarët komunalë ishin në vedin e ngjarjes për të konstatuar se janë bërë të gjitha përgatitjet e duhura teknike dhe operacionale për mbarëvajtjen e fushatës.
Drejtori Gashi tha se komuna e Hanit të Elezit nuk ka shumë sipërfaqe të tokës bujqësore për kultivimin e drithrave të bardha. Ai tha se sipas raportit të komisionit të matjeve të sipërfaqeve të mbjellura, janë afro 100 hektarë të mbjellura me drithra të bardha.
Ndërsa është formuar edhe një komision, i cili do ta përcjellë gjendjen në terren. “Për këtë fushatë kemi angazhuar në terren 3 autokombajna, tha anëtari i komisionit Besnik Reçi. Fushata e korrje –shirjeve është duke u zhvilluar në përputhje me rregulloren e miratuar nga Kuvendi i Komunës.
Sipas parashikimeve, pritet që fushata të përmbyllet brenda periudhës dhjetëditore, nëse mbajnë kushtet klimatike. Çmimi i korrjes për një hektar do të jetë 125 euro”, ka theksuar z.Reçi.
Drejtori Hajredin Gashi ka shtuar se rendimentet mesatare të grurit për hektar pritet të sillen rreth 3500-4000 kilogramë. Ai tha se gjendja e grurit në përgjithësi vlerësohet e mirë, ndërsa për rendimentet ka thënë të kenë qenë të kushtëzuara nga faktorët klimatikë. “Besoj se rendimentet do të jenë të mira, ndonëse ka pasur të reshura të cilat kanë pasur ndikime në rendimentin e grurit”.Ndryshe komuna e Hanit të Elezit ka subvencionuar të gjithë bujqit të cilët kanë pasë të mbjellura drithra të bardha dhe për këtë qëllim ka ndarë mbi 12.000.oo€.
Zyra për Informim
